Sëller Stuff

Kënnt Dir Iech kuerz virstellen?

Ech sinn d’Florence Rausch, hunn als Teenie zu Sëll gewunnt, a si bis haut aktiv an der Amicale vun de Sëller Pompjeeën. Meng Léier hunn ech an der Gastronomie gemaach a war duerno a verschiddene Restauranten hei an der Géigend täteg. Virun néng Joer hunn ech de Café-Restaurant Sëller Stuff iwwerholl a mech domat selbststänneg gemaach.

Wat gefält Iech un Ärem Beruff?

Ech ka mir keen aner Beruff virstellen – ech si keent fir de ganzen Dag hannert dem Computer ze sëtzen. Och wann d’Deeg laang sinn, maachen ech et mat Freed, an dowéinst fillt et sech net wéi Aarbecht un. Mat der Frittebud Beim Flo, si mir en Team vu fënnef. Déi familiär Stëmmung mécht, datt jidderee gär op d’Aarbecht kënnt.

Wat bitt Dir un an der Sëller Stuff? 

Mir hunn e Menu du Jour, mat 3 Entreeën an 3 Haaptplaten au Choix. Dënschdes bidde mir e Buffet à volonté fir 20€. Natierlech kënnen eis Gäscht och ëmmer à la Carte bestellen. Zousätzlech bedreiwe mir d’Frittebud Beim Flo; op béide Plazen ass Take-away méiglech. 

Och fir Banqueten, Hochzäiten, Gebuertsdeeg, Betribsfeieren oder Kommunioune sidd Dir bei eis wëllkomm. Eise Sall bitt Plaz fir bis zu 45 Persounen, am Summer hu mir eng gemittlech Terrass. Am Wanter zerwéiere mir an eiser iwwerdeckter Terrasse mat Uewe gäre Fleesch um Steen oder Kéisfondue.

Wat ass d‘Spezialitéit vum Haus? 

Kniddele mat Wäinzoossiss – mee och eis Tarte Flambée ass ganz beléift.

Organiséiert Dir Eventer?

Op mannst eemol am Mount hu mir eng Soirée, z.B. Scampis oder Moules à volonté, Afterwork, Western Owend oder Kniddelowend.

A wéi steet et mam Foodtruck?

Wéinst dem Chantier virun eiser Dierf hu mir ee Foodtruck gelount. Mëttlerweil si mir domat virun allem op grousse Fester ënnerwee. Et ass awer och méiglech, de Foodtruck fir privat Feieren ze lounen (ab 50 Gäscht). 

Ëffnungszäiten

• Dënschdes-Donneschdes: 11-14 & 16-23
• Freides: 11-14 & 16-01
• Samschdes 11-01 

Kontakt 

FB: Sëller Stuff, D’Frittebud Beim Flo
1, Route d’Arlon, 7471 Saeul
T. 621 456 922