La Différence: Nei Brasserie mat Hotel zu Viichten

D’Gemeng Viichten huet den ale «Café Différence», e fréiere Kult-Treffpunkt, renovéiert a vergréissert. Nieft der Brasserie gëtt et am Gebai och e klengen Hotel mat véier Zëmmer, enger Bäckerei Jos & Jean-Marie an enger Kinés-Praxis.

Kéint Dir Iech kuerz virstellen? 

Ech sinn d’Manon Pochet, gebierteg vun Heinstert an der Gemeng Atert, an aktuell wunne mir zu Biebereg mat eise véier klenge Kanner. No mengen Etüden zu Arel hunn ech an diverse Restauranten Erfarung gesammelt, ënner anerem zu Pärel an zu Dol.  

Ech sinn den Doriano Buscemi an hu meng Kandheet zu Monaco verbruecht an dono hei zu Dikrech d’Hotelsschoul ofgeschloss. Ech hunn och an e puer Restauranten an der Regioun geschafft, wéi z. B. dem Restaurant Roder, der Bauschelterstuff, dem Barnum an dem Restaurant Bissen.  

Wat huet Iech motivéiert, d’Leedung vun der Brasserie an dem Hotel ze iwwerhuelen?

Et war ëmmer eisen Dram, zesummen en eegene Restaurant ze féieren, wou mir alles op eis Manéier gestalten a plange kënnen. Haut fille mir eis bereet a genuch erfueren, fir dësen Dram Realitéit ginn ze loossen.  

Wat bitt Dir an der Brasserie un?

Mir bidden eng variéiert Kichen un, mat enger Mëschung aus traditionell lëtzebuergescher, italieenescher an enger Grimmel franséischer Kichen. Eis Kichen ass duerch eis Reesen inspiréiert an eise Motto ass: Qualitéitsprodukter zu engem faire Präis.  

Bitt Dir en Dagesmenü un?  

Jo, mir hunn all Woch en dräigängege Dagesmenü (Haaptplat: Fleesch, Fësch oder Vegetaresch).  

Wat ass d’Spezialitéit vum Haus?

Manon: Fir mech ass et de Burger Tarara, eise Burger mat Gewierzer vun der Île Maurice.  

Doriano: Ech si besonnesch stolz op eis Spare Ribs, déi bei niddreger Temperatur véier Stonne laang gegaart ginn, mat engem exoteschen Touch vu Kümmel.  

Schafft Dir mat lokale Produiten?

Absolut, mir schaffen esou vill wéi méiglech mat lokale Produiten. Eist Geméis kënnt vum Bauerebetrib vu Rëmmereg, den Ham vun der Metzlerei Meyer, de Kéis vun Hepperdang, an och de Bio-Haff Baltes liwwert eis Produkter. Eis Frellen këmmen aus der Our. 

Bitt Dir och en Heemliwwerservice un?

Am Moment net, vläicht an Zukunft, mee bis dohi bidde mir awer Platen à emporter un.  

Kontakt

La Différence
37, rue principale
L-9190 VICHTEN
+352 26 200 139
ladifference.lu
Horaires d’ouvertures :
Mardi et dimanche :
11h30 - 14h00
Mercredi au samedi :
11h30 - 14h00 et 18h00 - 21h30
Lundi : fermé