Op der Schock

Wat ass d’Missioun vun Op der Schock?

Eis Missioun ass et, Mënsche mat enger intellektueller Beanträchtegung Méiglechkeeten ze bidden, fir aktiv um gesellschaftleche Liewen deelzehuelen.

Wou befanne sech Är verschidde Sitten?

Eisen Haaptsite ass zu Réiden; hei sinn eis Aarbechts- a Formatiounsservicer, sou wéi och d’Administratioun an déi begleedend Servicer. Eise Service d’Activités de Jour (SAJ) an eise Fräizäitservice befanne sech zu Kéiber, eis Wunnstruktur zu Mäerzeg an d’Haus vum autonome Wunnen zu Wal. 

Wat fir Servicer bitt Dir un?

Mir bidde Servicer an 3 Haaptberäicher un: 

• Schaffen & Accueil – Eis Ateliers d’Inclusion Professionnelle (fréier Ateliers protégés), de Service d’Activités du jour an de Service Formation
• Wunnen – d‘Wunnstruktur 24/7 zu Mäerzeg an dat autonoomt Wunne mat Begleedung zu Wal oder an enger eegener Wunneng
• Begleedung – Service Fräizäit, Service Beroden a Begleede vu Beneficiairen zu enger méiglechst grousser Autonomie a Selbstbestëmmung an de Service Ressources fir psycho-pedagogesch an diagnostesch Suivien

Wéi vill Mënsche mat Beanträchtegung betreit Dir am Moment?

Am Moment betreie mir iwwer 100 Persounen, dovunner 70 Salariés handicapés an den Atelieren a 34 Persounen am Service d’Activités de Jour oder am Service Formation. Vill vun hinnen huelen och am Fräizäitservice a begleedende Servicer deel an/oder wunnen an enger vun eise Strukturen.

Wéi vill Mënsche schaffe bei Iech an engem regulären Aarbechtsverhältnis?

Aktuell schaffen 104 Persoune bei eis – a ganz ënnerschiddleche Beräicher: Verwaltung an technesche Service, Encadrement an deene verschiddene Servicer (Heelpädagogen, Sozialpädagogen, Erzéier, Infirmièren, Aide-soignant(e)en…), Kichen, Gäertnerei, Floristik, Botz an aner Servicer.

Aus wéi engem Eck kommen Är Beneficiairen?

Eis Beneficiairë kommen aus ganz Lëtzebuerg. Persoune mat enger Beanträchtegung dierfe fräi entscheeden, op wéi enger Aarbechts- oder Betreiungsplaz si eng Demande stelle fir opgeholl ze ginn – de Mobibus-Service erméiglecht hinnen dës Mobilitéit.

Wat fir Ateliers d’Inclusion Professionelle ginn et bei Iech?

Mir hunn insgesamt 9 Atelieren:

• Kultur-Gäertnerei: mir ziichten nëmme pestizidfräi Planzen a virun allem saisonal Blummen, Stauden a Kraider an dëst an enker Zesummenaarbecht mam SICONA.
• Landschafts-Gäertnerei: eis zwee Teams këmmere sech ëm naturno Gäert a Grénganlage vu Privatleit, Betriber a Gemengen aus dem Kanton Réiden an der noer Ëmgéigend.
• Kichen: mir kache fir eis Mataarbechter, bereede Bestellunge vir fir Clienten (Bréidercher, Zaloten, Desserten) souwéi eege Produite fir eise Buttek (Zoppen, Zoossen, Pesto & Tapenade, Gebeess & Sirop, Salz- & Zockermëschungen).
• Keramik: Gaardekeramik, Deko-Artikelen a saisonal Kreatiounen – och op Bestellung.
• Käerzen: Käerzen a ville Faarwen a Formen, op Wonsch personaliséiert.
• Wäscherei: mir wäschen Dicher an Aarbechtskleedung aus eisen Atelieren a Kleeder aus eiser Wunnstruktur
• Botzen: eng Ekipp botzt eis eege Gebaier, déi aner schafft fir Gemengen a Betriber.
• Buttek a Floristik: Verkaf vun de Produiten aus eisen Atelieren, Blummebouqueten, Kränz an Arrangementer (Hochzäit, Kommunioun, Begriefnisser, …) souwéi Corbeillen a Chèque-Cadeauen.
• Inklusiven Tourismus a liicht Sprooch: mir kréien Opträg vu Clientë fir Plazen a Visitte méi inklusiv ze gestalten. Zesumme mat betreite Mataarbechter, forméiere mir Guiden am ganze Land a schreiwen Texter an eng méi liicht Sprooch ëm.

D’betreit Mataarbechter vun eisen Atelieren hu souwuel de Statut vum Salarié handicapé wéi och d’Orientatioun an een Atelier protégé.

Fir ween ass de Service d’Activités de Jour (SAJ) geduecht?

Den SAJ ass fir Persounen, déi eng ganzheetlech Dagesfërderung brauchen. Hei gëtt eng grouss Villfalt un Aktivitéiten ugebueden: kreativ Aarbecht, Sport, Musik, kachen a baken, Kommunikatiounsfërderung, Wäsch maachen… Esouguer een Assistenzhond hëlleft am Alldag mat. D’Beneficiairë kréien an dësem Service och Prestatiounen am Kader vun der Fleegeversécherung.

Wat bitt de Service Formation?

De Service Formation ass fir jonk Leit mat enger Beanträchtegung, déi grad vun der Schoul kommen. Iwwer dräi Joer (an der Moyenne) kënne si hir Kompetenzen entdecken an entwéckelen a kréien esou eng ugepasst Beruffsausbildung, déi si op d’Aarbecht virbereet.  An dësem Service ginn och Erwuessener opgeholl, déi de Statut an d’Orientatioun schonn hunn, en vue vun der Evaluatioun vun hire Kompetenzen an der berufflecher Orientéierung. Si kréien hei dann och eng ugepasst Formatioun, fir (erëm) an d'Aarbecht ze kommen.
D’Formatioun fënnt an enker Zesummenaarbecht mat den Ateliere statt.

Wéi leeft den Alldag an Ärer Wunnstruktur zu Mäerzeg of?

Zu Mäerzeg hu mir 2 Wunngruppen. Hei wunnen 22 Persounen aus eise Servicer, plus ee Vakanzebett. An der grousser Kiche gëtt zesumme gekacht a giess. Jiddereen huet seng Verantwortung am Stot.
All Mount gëtt eng Bewunner-Versammlung organiséiert, an all Bewunner huet ee Bezuchsbetreier, dee si am Alldag ënnerstëtzt (Programm, Akaf, Ziler).
D’Nofro ass grouss – mir hu 26  Persounen op der Waardelëscht – dofir wëlle mir d’Kapazitéit erhéijen an nei Wunnformen entwéckelen, wat awer finanziell Ënnerstëtzung verlaangt.

Wéi finanzéiert Dir Iech an Är Projeten?

Mir hunn zwou juristesch Entitéiten: d’asbl, déi d’Wunnstruktur, de Service Formation an de Service d’Activités de Jour, sou wéi och déi begleedend Servicer ofdeckt, an d’Kooperativ, déi fir den Aarbechtsberäich zoustänneg ass. Mir hunn eng Rei Konventioune mat de Ministèren (Aarbecht, Famill, Logement) an der CNS (Assurance dépendance). De Rescht vun eiser Finanzéierung decke mir iwwer Donen an eege Recetten.
Bei Ausbauprojeten a gréisser Investitioune kréie mir zwar eng substantiell Ënnerstëtzung vum Staat, mee dës deckt net all Käschten. Esou hu mir beispillsweis bei der Wunnstruktur zu Mäerzeg, déi 5 Milliounen Euro kascht huet, 1,5 Milliounen Euro aus eegene Mëttele bäidroe missen.
Fir den Opbau vun neie Servicer a gréissere Bauprojeten si mer op Donen ugewisen. Mir spueren zur Zäit fir den Ausbau vu Réiden, souwéi och d’Schafe vu weidere Wunnplazen.

Wat sinn Är aktuell Pläng?

Mir schaffen zënter Joren intensiv un engem groussen Ausbauprojet um Site zu Réiden, well mir aus allen Néit platzen a grouss Waardelëschten hunn.
D’Zil ass, insgesamt 120 Plazen an den Atelieren unzebidden, doduerch datt mer di besteeënd Atelieren ausbauen, eng Restauratioun fir d’Ëffentlechkeet opzemaachen, e vergréisserte Kicheberäich ze bauen, an eng Conserverie. De ganze Site soll och an Zukunft mat enger Holzhackschnëtzel-Heizzentral gehëtzt ginn. Da gi Büroe geschaf fir d’Administratioun an déi begleedend Servicer, déi an de leschte Joren ëmmer méi gewuess sinn.

A wéi kënne Gemengen an Awunner aus der Regioun Iech an Ärer Missioun ënnerstëtzen?

Jiddereen ass häerzlech wëllkomm an eisem Buttek zu Réiden, deen all Dag vun 8–12 an 13–17 Auer a samschdes vun 8–12 Auer op ass (sonndes zou). Hei fannt Dir Blummen, Planzen, kulinaresch Produiten an originell Kaddosartikelen. 
Fir Gemengen ass eis Traiteur-Offer interessant, a mir hunn och mat e puer Gemengen eng flott Collaboratioun mat eise  Botz- a Landschaftsgäertnerservicer.

Kommt gären op eis Fester – a mir freeën eis natierlech ëmmer iwwer all Don!

Kontakt

Op der Schock asbl & s.c.
34, rue de Reichlange, L-8501 Redange 
Tél. : 26 62 18 81
info@ods.lu