Den Energiemusée vu Biekerech ass ageweit!

Den 19.Oktober gouf den Energiemusée an der Biekerecher Millen féierlech a Präsenz vum Minister fir Kultur, Gemengevertrieder a ville Bierger ageweit.

D’Sarita Neu vun der Kulturmillen asbl huet de Projet vum Energiemusée begleet. Mir hunn eis mat hir driwwer ënnerhalen.

Wéi ass d’Iddi entstanen, fir een Energiemusée opzemaachen?

Den deemolege Staatssekretär Guy Arendt ass mat der Iddi komm, fir eise Musée vum fréieren Handwierk, deen an d’Jore komm war, an een Energiemusée ëmzefunktionéieren. Doropshi gouf den „Atelier für Gestaltung“ vu Berlin engagéiert, fir e Konzept zesumme mat der Kulturmillen auszeschaffen.

Wat ass mat den Ausstellungsstécker vum Musée vum fréieren Handwierk geschitt?

E puer vun den Ausstellungsstécker sinn nach ëmmer am neie Musée ze gesinn. Fir déi aner Ausstellungsstécker gëtt aktuell en neie Projet virbereet, an deem geplangt ass, se am ale Schapp um Site vun der Biekerecher Millen auszestellen.

Wat waren d’Schwieregkeete bei der Ëmsetzung?

De Musée ass relativ kleng mat 5 verschiddene Raim, an et war eng Erausfuerderung, eng kohärent Geschicht tëscht de verschiddene Kapitelen ze schafen. Bei der Ëmsetzung hu mir mat ville Firmen zesummegeschafft, wat eng gutt Organisatioun erfuerdert huet.

Wien huet de Projet finanzéiert?

D’Gemeng Biekerech an de Kulturministère hunn deProjet finanzéiert.

Wat erwaart d’Visiteuren am Energiemusée?

D’Visiteuren entdecken d’Geschicht vun de Proprietäre vun der Millen, déi als Éischt hei zu Lëtzebuerg Stroum produzéiert hunn. De Musée féiert duerch d’Zäitgeschicht vun de verschiddenen Energiequellen, ugefaang bei der Muskelkraaft, dann der Waasserkraaft, bis bei d’Biogasanlag, d’Wärmenetz vun der Gemeng Biekerech an d‘Wandkraaft. Dës Rees gëtt uechter Biller, Fotoen an interaktive Statiounen erlieft, déi d‘Entwécklung vun der Energie op eng dynamesch a spannend Aart a Weis erzielen.

Vu wou kommen d’Ausstellungsstécker?

D’Ausstellungsstécker stamen zum groussen Deel aus dem ale Musée. Eis interaktiv Statioune goufen deels vun eise Millepätteren an hirer Seeërei fabrizéiert. Fir déi aner Statiounen hu mir mam Science Center zesummegeschafft.

Bitt Dir och Féierungen un? Wéi gesäit et fir Schoulklassen aus?

Jo, mir bidde Féierunge fir Gruppen un. Mir schaffen aktuell drun, spezifesch Féierunge fir Schoulklassen unzebidden, zesumme mat Atelieren, déi d’Kanner wärend der Visite kënne maachen. Mir hoffen, datt dëst Konzept geschwë prett ass.

Op wéi enger Sprooch sinn d’Erklärungen am Musée?

D’Texter sinn all op Franséisch, awer et besteet d‘Méiglechkeet, duerch d’Scanne vun engem QR-Code, d’Erklärungen och op Däitsch an Englesch ze liesen.

Wéini ass de Musée op?

De Musée ass säit dem 1. September 2024 permanent fir de Public zougänglech. Fir eranzekommen, muss een op der Plaz de QR-Code scannen, deen op der Dier ass, an da kritt een den Accès. De Musée ass net mat Personal besat.

Gëtt et een Deel am Musée, deen Dir besonnesch gutt gefält?

Mir gefale besonnesch déi Deeler mat den alen Ausstellungsstécker an de Schaf wou d’Geschicht vun der Waxweiler Famill, de Besëtzer, duergestallt ass.

Merci villmools Sarita fir all dës Informatiounen. Mir wënschen Dir an der Kulturmille vill Erfolleg mam neie Musée.