Georges Even

Een neit Buch vum Georges Even „Waffen-SS 1940-1945 Luxemburg“

Veröffentlicht: 12/10/2026 - 10:30

Aktualisiert: 27/10/2026 - 10:37

3 Minuten

De Georges Even vun Ell huet an de leschte Joerzéngten eng ganz Rei Bicher iwwer d'lëtzebuergesch Geschicht am Zweete Weltkrich publizéiert. A senge Wierker beschäftegt hie sech ëmmer nees mat manner bekannte Kapitelen aus där Zäit a recherchéiert d‘Schicksaler vun deenen, déi dës Besatzung materlieft hunn.

A sengem neiste Buch widmet sech de Georges engem besonnesch sensibelen a laang Zäit wéineg beliichte Kapitel vun eiser Geschicht: de Lëtzebuerger, déi an der Waffen-SS gedéngt hunn, enger militärescher Organisatioun vum nationalsozialistesche Regimm, déi fir hir Brutalitéit berüchtegt war.

Här Even, wëllt Dir Iech de Lieser kuerz virstellen?

Ech schaffe beim Staat, si bestuet, an hunn dräi Kanner. Zënter ville Jore beschäftegen ech mech intensiv mat der lëtzebuergescher Geschicht, besonnesch mam Zweete Weltkrich.

Wat huet Iech motivéiert, Iech mat esou engem kriddelegen Thema – also Lëtzebuerger an der Waffen-SS – auserneenzesetzen?

Et ass ee vun deene wéinege Kapitelen aus der Lëtzebuerger Geschicht, dat nach ëmmer net am Detail erfuerscht ass. Genee dat huet mäin Interessi erwächt a mech motivéiert, fir mech mat dësem Thema auserneenzesetzen.

Wat fir nei Erkenntnisser liwwert Äert Buch?

Ech hat net erwaart, datt ronn 100 Persoune vu Lëtzebuerg an der Waffen-SS waren. Et ass awer wichteg ze betounen, datt all Eenzelen seng eege Geschicht hat, déi am Buch dokumentéiert gëtt. Vun dësen ongeféier 100 Persoune sinn der ronn 20 fräiwëlleg der Waffen-SS bäigetrueden. Ronn zéng dovu kënnen als iwwerzeegt Nationalsozialisten agestuuft ginn.

Wie waren déi Lëtzebuerger, déi sech der Waffen-SS ugeschloss hunn?

Et ware Leit aus de verschiddenste Schichte vun der Gesellschaft. Vill hunn op der Schmelz oder an der Landwirtschaft geschafft. Ënnert hinne waren awer och Schlesser, Bäcker, Studenten an en Architekt.

Wësst Dir, ob och Männer aus eisem Kanton drënner waren?

Jo, 4 waren aus dem Kanton Réiden.

Wat ass mat den Iwwerliewende vun der Waffen-SS nom Krich geschitt?

Bal all hu se sech nom Krich virun engem lëtzebuergesche Geriicht misse verantworten. Vill vun hinne goufen zu héije Prisongsstrofe verurteelt.

Wat wënscht Dir Iech, datt d’Lieser nom Liese vun Ärem Buch besser verstinn?

Et ass wichteg, sech bewosst ze sinn, wéi séier ee selwer an d’Fäng vun enger Besatzungsmuecht gerode kann, aus där et schwéier oder esouguer onméiglech ass, erëm erauszekommen. Et soll een och ni ze séier iwwer aner Mënsche jugéieren, well all Eenzelne seng eege Geschicht an eege Beweeggrënn hat.
D’Lieser solle sech d’Fro stellen: Wéi hätt ech selwer an där Situatioun reagéiert?