De Musée Michel Lucius

Zu Rëmmerech am Gebuertshaus vum Michel Lucius (1876-1961), dem bekanntste Lëtzebuerger Geolog, befënnt sech haut e Musée, dee sengem Liewen a senger grousser Leidenschaft gewidmet ass. 

Mir hunn eis mam Jos Bormann, dem Guide vum Musée, ënnerhalen. 

Wéi ass et zum Musée komm? 

Am Heemichtshaus vum Michel Lucius huet bis 1978 eng eeler Koppel gewunnt. Wéi de Staat d’Haus 1993 mat der Absicht kaf hat, e Musée anzeriichten, war et an engem schlechte baulichen Zoustand. Duerno ass Jore laang näischt geschitt. 
Op Initiativ vum deemolige Buergermeeschter Emile Calmes gouf 2001 den Institut géologique Michel Lucius (IGML) gegrënnt. De Veräin huet sech intensiv fir d’Renovéierung vum Haus agesat, an 2005 konnt de Musée endlich offiziell ageweit ginn.

Wat ass d’Missioun vum Musée? 

D’Missioun vum IGML war d’Erënnerung un de berüümte Geolog ze erhalen an de Public mat der Geologie vun eisem Land vertraut ze maachen. An deenen éischte Jore goufe Konferenzen an Exkursioune organiséiert, Schoulklassen empfaangen an Aktivitéite mam PANDA-Club ugebueden.

Mat der Zäit hunn d’Aktivitéite vum Veräin ofgeholl. 2013 hunn ech als Bénévole ugefaang, Visitten ze begleeden. Haut empfänke mir virun allem Schoulklassen an aner Gruppen, dorënner och Senioreveräiner.

Wat sinn deng perséinlech Highlights am Musée?  

Ech denken un 3 Saachen:

• Et ass erstaunlech, datt den Numm vum Michel Lucius och no 100 Joer an der Tierkei nach ëmmer héich geschat gëtt. Dat beweisen dräi Placketten, déi tëscht 2003 an 2005 vum tierkesche Ministère fir Energie a Ressourcen u Vertrieder vu Lëtzebuerg iwwerreecht goufen.
• Ech amuséiere mech ëmmer nees iwwert déi erstaunte Gesiichter vu Visiteuren, wann ech erzielen, datt de Michel Lucius am Alter vu 85 Joer bei der Aarbecht op sengem Büro bei „Ponts et Chaussées“ gestuerwen ass.
• Op der geologischer Kaart gesäit een, wéi kleng d’Minett-Virkommen am Süde vum Land sinn. Geologisch Prozesser viru ronn 180 Mio. Joer souwéi eng Grenzzéiung mat Frankräich am 17. Joerhonnert hunn dozou geféiert, dass Lëtzebuerg zoufällig ronn 3.800 ha vun engem 200.000 ha groussen Eisenerzbecken krut. De Wuelstand vun eisem Land berout op dësen zwee Zoufäll, déi eng Eisenindustrie bei eis erméiglecht hunn. 

Wat sinn Är aktuell a geplangte Projeten?

Am Kader vun engem LEADER-Projet wëlle mir de Musée Michel Lucius méi bekannt maachen an em neit Liewen anhauchen. E soll weiderhin an éischter Linn e wëssenschaftleche Musée bleiwen. Donieft stelle mir eis de Musée och als Treffpunkt fir kleng Gruppe vir.

Wat sinn Är gréisst Erausfuerderungen?

Mir sinn op engagéiert Leit ugewisen, déi sech wëllen abréngen. Besonnesch wäertvoll wier et, nach eng Geologin oder e Geolog ze gewannen, déi eis Laie fachlech begleede kéinten.
Zugläich hoffe mir, datt de Musée dem Staat wichteg bleift an datt d’Gemeng Préizerdaul och an Zukunft fir den deeglechen Ënnerhalt suergt. Dofir si mir ganz dankbar.

Jos, firwat engagéiers du dech am Musée? 

Ech bewonneren de Michel Lucius, dee säi Liewen trotz munche Réckschléi beharrlich nom Motto „Lebe deinen Traum“ gestalt huet.
An als ausgebilten Ingénieur sinn ech och mat 75 Joer nach ëmmer staark un allem interesséiert, wat mat Naturwëssenschaft ze dinn huet.

Bléck an d’Zukunft: Wat wënschs du dir fir de Musée?

Ech géif mir wënschen, datt de Musée pedagogesch ausgebaut gëtt, zum Beispill mat engem Animatiounsfilm iwwer déi geologesch Prozesser. Esou Filmer ginn et schonn am Geopark Mëllerdall. 
Zousätzlech ginn et zu Lëtzebuerg vill kleng lokal Muséeën, déi mat änleche Problemer konfrontéiert sinn. Firwat dës net an engem Netzwierk zesummeféieren an e gemeinsame Visitteprogramm – eng Zort „Tour de Luxembourg“ – opbauen?

Mir soen dem Jos Bormann e grousse Merci fir säin Engagement a wënschen him an dem Musée vill Erfolleg! 

Kontakt

Musée Michel Lucius
9, rue Dr. Lucius
L-8414 Reimberg 
Gemeng T. 26 62 99-140
Guide: 23 62 05 36

Ëffnungszäiten: all 1. Sonndeg am Mount vun 10h30 bis 11h30 fir Visitten ouni Umeldung op. 

Visitte sinn och fir Gruppen zu aneren Terminer méiglech.