Zwou nei historesch Publikatiounen

Am Hierscht sinn zwou nei héich interessant historesch Publikatiounen aus eisem Kanton erausbruecht ginn:  

1624 – Hexejuegd zu Uselding

D’Prioratsfrënn vun Uselding asbl hunn e Buch iwwert de Prozess vun der Katrin Theis erausbruecht.  

An der Useldinger Duerfgeschicht stécht d’Joer 1624 besonnesch ervir duerch den Hexeprozess géint d’Katrin Theis, eng traureg, awer héich interessant Säit vun der Useldinger Geschicht. Dës Geriichtsaffär gouf scho virun e puer Joer vum Jemp Schuster als Héierspill geschriwwen, an am Oktober 2024 hu mir, genee 400 Joer nom Prozess, eng Theateradaptatioun mat groussem Erfolleg op d’Bün bruecht. Dat war den Ausléiser fir d’Buch.

De komplette Geriichtsrapport vun deemools ass erhale bliwwen – eng Raritéit. Doraus ergi sech wäertvoll Ablécker an de juristeschen, politeschen a soziale Kontext vum 17. Joerhonnert, souwéi an d’Liewen an d’Duerfstruktur vun där Zäit.

D’Buch wëll net nëmmen d’Fakten dokumentéieren, mee och e Gefill fir d’Zäit vermëttelen –d’Ängschten, de Glawen, d’Muechtverhältnisser. Et soll weisen, wéi esou eng Hexeverfollgung entstoe konnt a wat mir haut doraus kënne léieren.

D’Buch 1624 Hexejuegd zu Uselding – De Prozess vun der Katrin Theis ass am Oktober 2025 erauskomm. Et ëmfaasst 230 Säiten, enthält vill Fotoen an Illustratiounen.  
D’Oplo ass limitéiert op 250 Exemplaren, de Präis läit bei 58 €. Bestelle kann een iwwer alwal@pt.lu an Tel. 691 63 00 44.

De Viichter Geschichtsfrënd N°23

D’Viichter a Mäerzeger Geschichtsfrënn hunn eng nei Broschür erausginn.  

D’Theme vun dëser 23. Viichter Geschichtsfrënn – Broschür sinn:  

• Prospections en 2024 de Romain Jacoby et Marco Pavani – Préhistoire (M. Valotteau)
• Einführung in die Numismatik (Mme Reichert)
• Drei Köpfchen – eine Werkstatt (M. Krier)
• Une géophysique entre Schandel et Vichten (Mme di Liberto)
• Die Kirche St Michael in Colmar-Berg (M. Langini)
• Der Mord auf der Viichtener Haide
• 80 Joer Liberatioun
• Vichten zu Ende des 2. Weltkrieges und in der Rundstedtoffensive
• Projet Stolpersteine – commémorer la Deuxième Guerre mondiale au Luxembourg
• Eng Bomm um Kazebur
• Eng V1 zu Schandel
• Neuerscheinung – von der Besatzung bis zur Flucht während der Ardennenoffensive
• Das Wegekreuz „Zöhlekräiz“ in Mertzig
• Autoen an Trakteren am Joer 1955 zu Bëschrued
• Mir denken un eis Memberen, déi äis verlooss hunn  
• Berichter iwwert d’Aktivitéiten vum Veräin:

Dir kënnt d’Broschüre bestellen, andeems dir 25,00 €  iwwerweist op de Konto

vun de Viichter a Mäerzeger Geschichtsfrënn 

CCRALULL LU03 0090 0000 7423 4436