Gemeng Préizerdaul

Den Dauler Fiederball stellt sech vir

Veröffentlicht: 14/10/2025 - 14:24

Aktualisiert: 28/10/2025 - 15:09

2 Minuten

1996 gegrënnt zielt den Dauler Fiederball haut iwwer 50 aktiv Memberen. Et ass deen eenzege Fiederball-Veräin am Réidener Kanton.

U wee riicht sech Äre Veräin?

Mir sinn op fir Jonker ab 10 Joer an Erwuessener. Déi meescht si jonk Erwuessener, mee mir hunn och nach Memberen iwwer 60. Gruppen no Alter ginn et net – mir trainéieren alleguer zesummen.

Spillt Dir och Competitiounen?

Jo, dat ass ee wichtegen Deel. Verschidde Spiller hunn eng Competitiounslizenz a spille bei Masteren oder Landesmeeschterschafte mat. Fir Spiller mat Hobbylizenz ginn et ronn zéng Turnéieren d’Joer am Land. Selwer organiséiere mir véiermol d’Joer en Turnéier.

Wat zeechent d’Veräinsliewe bei Iech besonnesch aus?

Nieft dem Training si vill vun eis och privat gutt Frënn, bal all Dag leeft eppes – eng Aktivitéit, ee Message oder e kollegiaalt Beieneesinn. Mir maachen Ausflich op Turnéier, ginn zesumme spadséieren oder Vëlo fueren a paken eng Hand u bei lokalen Evenementer wéi Ouschteren am Daul, Street Festival oder der Nuit du Sport.

Op wat fir besonnesch Momenter kann Äre Veräin zréckkucken?

Een Highlight war 2017, wou mir mat enger akademescher Seance an enger Publikatioun eis 20-Joer gefeiert hunn. Sportlech gesinn hu mir all Joer Erfolleger – iergendeng vun eisen Equipe steet sécher bei engem Masters um Podium. 2 vun eise Männer haten an hirer Kategorie 2025 d’Landesmeeschterschaft gewonnen.

Wat sinn Är Erausfuerderungen de Moment?

Mir schaffen zesumme mat der Federatioun drun, eis Trainingen nei opzestellen. Déi zweet Erausfuerderung ass déi schlecht Siicht an der Sportshal: déi wäiss Bäll si virun der wäisser Rideau kaum ze gesinn. Hei hoffe mir op Ënnerstëtzung vun der Gemeng, fir eng méi däischter Rideau oder soss eng Léisung ze fannen.

Wéi kënnen Interesséierter sech dem Veräin uschléissen?

Direkt Member gëtt een net. Fir d’éischt mellt een sech bei engem Comitésmember a kënnt 4–5 Mol schnupperen. Wann et engem gefält, froe mir eng Lizenz un an da gëtt de Joresbäitrag fälleg.