Wéi eng Sportsveräiner gëtt et am Kanton Réiden?

Wosst Dir, datt et am Kanton Réiden op d'mannst 54 aktiv Sportsveräiner ginn? Vum traditionelle Fussball- an Dëschtennisveräin iwwer Dart an Indiaca bis bei de Seegelfliger – d'Offer ass méi villfälteg, wéi ee mengt.

Mir hunn all Sportsveräiner aus dem Kanton kontaktéiert. Mir soen all deene Veräiner e grousse Merci, déi eis hir Äntwerten erageschéckt hunn. Wa mir keng Äntwert kruten, hu mir d'Informatiounen op Basis vun hire Websäiten oder hire soziale Medie zesummegestallt. Sollt Iech e Feeler opfalen oder eng Informatioun net méi aktuell sinn, sot eis wgl. Bescheed (communication@kanton-reiden.lu). Dës Lëscht mat zousätzlechen Detailer wäert och op eisem zukünftegen Internetsite publizéiert ginn a reegelméisseg aktualiséiert ginn.

Hutt Dir Loscht, eng nei Sportaart auszeprobéieren oder Iech an engem Veräin z'engagéieren? Da mellt Iech gären direkt beim Veräin. Vill Veräiner freeë sech net nëmmen iwwer nei Sportlerinnen a Sportler, mee och iwwer fräiwëlleg Hänn, déi d‘Veräinsliewen ënnerstëtzen.