Eng spannend Zäitrees an d’Geschicht vu Viichten

Sonndes, den 6. Juli, huet den éischte guidéierte Zäitrees-Trëppeltour vun dëser Saison zu Viichten stattfonnt. De Syndikat Kanton Réiden organiséiert dëst Joer am Ganze fënnef esou historesch Spadséiergäng.

Trotz Dauerreen hu sech eng 20 Persounen zesumme mam Romain Jacoby vun de Viichter a Mäerzeger Geschichtsfrënn op de Wee gemaach. Um Zäitrees-Circuit si mir bei de verschiddene Pannee stoe bliwwen a kruten ganz interessant Ablécker an d’Duerfliewe vun fréier: mir kruten iwwer déi zwee Duerfdeeler Uewer- an Ënnerviichten erzielt, iwwer Hochzäiten a Fändelweih, iwwer Prëssiounen am Duerf an d’Invasioun vum 10. Mee 1940. 

 Weider goufe mir informéiert iwwert d’al Schoul vu Viichten, déi fënnef Epicerien, déi et fréier am Duerf gouf, d’Schmëtt, d'Schluechte vun de Schwäin am Wanter, déi zwee Wäschbueren, d’Ardennenoffensiv, verstoppte Refraktären am Duerf an déi traureg Schicksaler vun den Duerfbewunner, déi net méi zeréckkoumen.

De Romain huet eis och beandrockend Detailer iwwert d’Réimeriwwerrechter, déi am Duerf nieft der Villa fonnt goufen, verroden. Dësen informativen a beräicherende Moie gouf beim Mosaik mat engem Patt ofgeschloss – och wann e waarmt Gedrénks bei deem naasse Wieder wuel besser gepasst hätt!

Mir soen dem Romain Jacoby an de Viichter a Mäerzeger Geschichtsfrënn e grousse Merci fir hiren Asaz an dësem Projet an de kompetente Guidage. 

Déi nächst Rendezvous vun de geféierten historeschen Trëppeltier: 

• Sonndes, 7. September, 15h00–17h30 am Préizerdaul, mat um 17h30 uschléissender Presentatioun vum DigitalArchiv Préizerdaul (DAP) duerch den Arthur Bour an de Claude Steichen.
• Sonndes, 14. September, 14h00–18h00 zu Bungeref, mam Romain Gaspar um Nic. Molitor-Wee, uschléissend (fakultativ) Iessen am Restaurant La Galerie, fréiere Hotel Molitor.
• Sonndes, 28. September, 9h30–12h00 zu Uselding, mam Stephie Reichert, Lé Gregorius a Georges Majerus vun den Useldinger Prioratsfrënn.
• Sonndes, 5. Oktober, 9h30–12h00 zu Ell, mam Alwin Geimer a Romain Gaspar, Thema: d'Schleisen an der Grousswiss zu Ell. 

Umeldung: event@kanton-reiden.lu