Op Zäitrees duerch de Wëlle Westen – Nei Trëppeltier mat Panneauen

Eise Kanton ass räich u Geschicht a Geschichten, un Traditiounen a spannenden Anekdoten. Dat gëtt eis och ëmmer erëm vu Visiteure bestätegt, déi an eise Kanton luusse kommen. Eis Geschichtsveräiner, Lokalhistoriker, Hobbysammler a Muséeën hu glécklecherweis iwwer Joerzéngten eng aussergewéinlech Aarbecht geleescht a vill Fotoen, Dokumenter a Material gesammelt, opgeschafft an archivéiert.

Fir e Stéck vun dësem Räichtum mat den Awunner a Visiteuren ze deelen, gouf 2021 de Projet „Op Zäitrees duerch de Wëlle Westen“ an d’Liewe geruff. Deemools goufen 100 Panneaue mat ale Fotoen am ganze Kanton opgeriicht.

Aktuell kommen nach e puer weider Panneaue bäi, sou dass mir an all Gemeng elo een Zäitrees-Trëppeltour ubidde kënnen, op deem een a reegelméissegen Ofstänn flott historesch Fotoen aus dem Duerf entdecke kann. 

Nei ass och, dass op all Tour an Zukunft ee Gucklach-Panneau steet respektiv stoe kënnt – mat enger aler Foto, natierlech aus eisem Kanton.

De Projet gouf zu engem groussen Deel vun der Œuvre Nationale de Secours Grande-Duchesse Charlotte finanzéiert. Ouni den Engagement an d’Kompetenz vun eise Geschichtsveräiner a Lokalhistoriker wier dëse Projet net méiglech gewiescht. Mir soen hinnen e ganz häerzleche Merci fir hir wäertvoll Hëllef an déi exzellent Zesummenaarbecht!

Deemnächst kënnt och eng Zäitrees-Kaart eraus, op där all d’Trëppeltier an historesch wichteg Plazen agedroe sinn. Dir wäert dës Kaart an eiser Tourist Info zu Useldeng kafe kënnen.

Profitéiert och vun eise guidéierten Zäitrees-Trëppeltier, déi am Summer an am Hierscht stattfanne wäerten. Dëst ass eng eemoleg Geleeënheet, fir zesumme mat eise fachkënnege Lokalhistoriker op Zäitrees duerch eis Dierfer ze goen a vill erstaunlech Informatiounen iwwer d’fréiert Liewen am Kanton ze kréien.