Erweiderungsprojet vun der Réidener Schwämm: e klengen Update

De Comité vum Gemengesyndikat „Réidener Schwämm“ huet eng wichteg Richtung fir d’Zukunft vun eiser Schwämm ageschloen: An der Sëtzung vum 22. Abrëll gouf de finale Projet fir de Bau vun enger Annexe validéiert, mat enger Gesamtinvestitioun vun 29,5 Milliounen Euro (TTC).

Nom Ofschloss vun der Planungsphase geet de Projet elo an eng nei entscheedend Etapp – d’Virbereedung vum Bau. Dëse wäert a verschidde Phasen oflafen:

• Ofschloss vun den Avise vun de concernéierte Ministèren,
• Ofschloss vun de néidegen Autorisatiounsdemanden,
• Ofschloss vun de Soumissiounsdossieren,
• Lancement vun der ëffentlecher europäescher Ausschreiwung, geplangt fir dat lescht Trimester 2025.

Mir rechnen, dass déi eigentlech Bauphase Ufank 2026 ugeet. D’Dauer vum Chantier gëtt op dräi Joer geschat, mat engem viraussiichtlechen Ofschloss vum Chantier Enn 2028.

Dësen ambitiéise Projet soll deen ëmmer méi groussen Ufuerderunge vun de Benotzer gerecht ginn, andeems modern, funktionell an un d’Besoine vun eiser Regioun ugepasste Strukturen ugebuede ginn.

Mir halen Iech natierlech iwwer d’Entwécklung vum Projet reegelméisseg um Lafenden.