Wou ass den Ausbau vun den nationale Vëlospisten an der Gemeng Rammerich drun ?

Mir hu beim responsabele Gestionnaire vu Ponts&Chaussées nogefrot:

PC17 Rammerich - Kietscht

De Verlaf vun der neier Vëlopiste soll op der aler Jhangelisbunn westlech vun der N23 verlafen. Aktuell leeft eng Ëmweltstudie well dës al Zuchstreck iwwer d’Joren zougewuess ass. Wann dës Studie Enn des Joers virläit, entscheet den Ëmweltministère, ob dëse proposéierte Verlaf ka bäibehale ginn oder ob d‘P&CH de Verlaf grondleeënd muss änneren.  

PC17 Kietscht - Wäissenhaff

D’Vëlospiste vu Kietscht soll bis bei de Wäissenhaff laanscht d’N23 verlängert ginn. D’Ëmweltgeneemegung ass vun der P&CH ugefrot a soubal dës vum Ëmweltministère ausgestallt ass, gëtt de Projet ausgeschriwwen an d’Aarbechten ugefaangen.

PC17 Roumicht - Uewermaartel

D’Vëlospiste soll westlech vum CR311 op der aler Jhangelisbunn verlafen. Wann dësen Avant-Projet vun der Mobilitéitsministesch gutt geheescht gouf, sollen nach dëst Joer déi néideg Autorisatiounen an Emprisen ugefrot ginn. Integréiert an dee Projet, soll och eng Renaturéierung vun der Roumicht-Baach vun der Waasserverwaltung ënnerholl ginn.

PC18 Ueschdref - Ënsber

An dësem Projet si vill Emprisen néideg, de Moment ass et net méiglech een Datum fir de Bau ze ginn.