Réckmeldung vun der ATP betreffend Buslinn 911 & Ubannung u Belval

Hei sinn d'Äntwerte vun der Administration des Transports Publics (ATP) op eis Froen: 

1) Mir wënschen eis, dass den 30min Takt vum 911 iwwer de ganzen Nomëtten bäibehale bleift. 

Äntwert vun der ATP: D'Demande fir den Takt vun der Linn 911 ze erhéijen steet net a Relatioun mat de Käschten, déi et mat sech bréngt. Dofir kënne mir där Ufro net nokommen.

2) Wier et méiglech eng weider Course vum 911 um 22h10 vun der Stäreplaz Richtung Mäerzeg starten ze loossen (aktuell gëtt et eng Course um 21h10 an duerno réischt um 23h10)?

Äntwert vun der ATP: D’Käschte sinn ze héich par rapport zur Ufro. Déi meescht Linnen um RGTR Reseau fueren owes am 2 Stonnentakt, mir hunn ons d’Comptagen ugekuckt an des Faarten si relativ schwaach besat, dowéinst ass eng zousätzlech Faart finanziell net ze justifiéieren.

3) Wier et méiglech fir Freides & Samschdes eng Nuetscourse op der 911 Linn no der leschter Course vu  23h10 aus der Stad zréck virzegesinn?

Äntwert vun der ATP: Aktuell bitt den RGTR keng Nuetsfaarten un, de Ministère subsidéiert awer Nuetslinnen oder Rufbusservicer, déi vun de Gemengen organiséiert ginn.

4) Déi aktuell Ubannung mam ëffentlechen Transport vum Kanton Réiden aus an de Süden, speziell op Esch-Beval, ass ganz ëmständlech. Wier et méiglech, eng Direktlinn aus dem Kanton Réiden op Esch-Belval virzegesinn? 

Äntwert vun der ATP: Är Idee ass dem zoustännegen Service vum Ministère weidergeleet ginn. Dem Virschlag kann awer réischt fir de nächste grousse Planungswiessel Rechnung gedroe ginn. Deem ginn Etuden an Analyse vun de Matarbechter vum Ministère viraus.
An Tëschenzäit misst Dir no enger Alternativ sichen; z.B. mam Bus an d’Staat Lëtzebuerg fueren an dann mam Zuch weider op Belval.
Zu ärer Informatioun: den 750 bleiwt op sovill Diefer stoen well eng Demande fir dësen Service besteet.