De Randschelter Pad ass nees op – a de Solar-Ravi waart zu Randschelt op Iech

Zënter kuerzem steet de Solar-Ravi um Parking vum Klenge Bistrot zu Randschelt. Dëse Frigo, dee komplett mat Solarenergie bedriwwe gëtt, bleift de ganze Summer iwwer op der Plaz a bitt Wanderer, Vëlosfuerer a Visiteuren eng praktesch Méiglechkeet, sech z'erfrëschen. 

Am Frigo fannt Dir Gedrénks an eng kleng Auswiel u Snacks. D'Benotzung funktionéiert am Self-Service – bezuelt ka souwuel a boer wéi och mat Payconiq. De Solar-Ravi baséiert op Vertrauen, dofir hoffe mir, datt jidderee sech un d'Spillreegelen hält an éierlech bezilt.

Et gëtt och gutt Noriichten vum Randschelter Pad: Nom Ofschloss vun den néidege Bëschaarbechten ass de Meditatiounspad zënter dem 1. Mee nees op. Op enger Längt vun 1,2 Kilometer invitéieren zwielef Statiounen d'Visiteuren dozou, zur Rou ze kommen, nozedenken an d'Natur bewosst ze erliewen. 

De Start vum Pad ass um Parking nieft der Kierch zu Randschelt.