Op Entdeckungstour am Wëlle Westen mam Mia & Emil

„O, wann ech dat schonn héieren! Mir gi schonn nees spadséieren!“ 

Wien elo u seng eege Kanner denke muss, fir dee gëtt et am Wëlle Westen elo genau dat Richtegt: Mat den neie Mia-&-Emil-Toure gëtt den nächste Familljenausfluch bestëmmt kee langweilege Spadséiergang, mee eng richteg Entdeckungstour. 

Ob de Weekend oder wärend der Vakanz – „Mia & Emil“ bitt flexibel a gratis Aventuren, an dat direkt virun der Dier. D’Konzept ass einfach: Eng spannend Geschicht féiert Kanner an hir Elteren op verschidde besonnesch Plazen an der Regioun. All Tour enthält nieft der Geschicht eng Kaart mat engem Trëppel- oder Vëlostour an Iddie fir eng spilleresch Aktivitéit, wéi e Quiz, e Wanderbingo oder och e Wanderbild. Wien dann nach Zäit huet, fënnt och Tipps fir weider Plazen ze entdecken. 

Ob am Musée Thillenvogtei zu Randschelt, der Buerg vun Useldeng, dem Schiefermusée zu Uewermaartel, dem Energiemusée an der Kulturmillen zu Biekerech, dem Park zu Kolpech beim Schlass, bei der aler Eech zu Sëll, dem Musée Michel Lucius zu Rëmerech, dem 385th Bomb Group Museum zu Pärel oder virun dem Turelbaacher Schlass zu Mäerzeg – gitt selwer op Entdeckungstour a fannt eraus, wat d’Mia an den Emil schonn alles Spannendes erlieft hunn! 

Dir fannt all d’Toure mam Mia & Emil als Fichë fir auszedrécken, gratis op https://www.visitguttland.lu/de/entdeckungstouren-fuer-kinder. 

Dëse Projet gouf ëmgesat am Kader vum LEADER-Projet Geschichteland: Muséeen am Wëlle Westen mat der Ënnerstëtzung vu Visit Wëlle Westen! 

LEADER WËLLE WESTEN
43, Grand-Rue ∙ L-8510 Redange / Attert
T. 28 33 49 20
wellewesten@leader.lu
www.leader.lu