Merci fir Är Meenung! Hei sinn d'Resultater vun eiser Ëmfro.

De Magazine "De Kanton Réiden" gëtt et elo zënter bal zwee Joer, Zäit fir de Bols bei Iech Lieser ze spieren. Dofir hu mir Iech gefrot, wéi Iech de Magazine gefält a wat mir nach kënne verbesseren. 

Mir soen all deene Merci, déi sech Zäit geholl hunn, un eiser Ëmfro deelzehuelen. Am Ganzen hu  174 Bierger matgemaach. Hei sinn déi wichtegst Resultater am Iwwerbléck:

• De Magazine kënnt gutt un: 71 % vun de Participante liesen en ëmmer, 22 % meeschtens a 6 % heiansdo. 59 % bewäerten en als ganz gutt an 38 % als gutt. 88 % liesen d'Artikelen op Lëtzebuergesch, 12% op franséisch.
• Déi Themen, déi eis Lieser am meeschten interesséieren, sinn Aktuelles (78 Nennungen), Fräizäit & Tourismus, besonnesch Trëppel- a Vëlostier (40), souwéi den Agenda an d'Evenementer (34).
• 88 % vun de Participante si mat der Opdeelung tëscht Text a Biller zefridden. 6 % géife sech manner Säite wënschen, wärend 6% sech méi Biller a manner Text wënschen.
• 37 % vun de Participante sinn op eisen Newsletter abonnéiert, déi all Mount erschéngt an ënner anerem en aktualiséierten Agenda enthält.
• 94 % vun de Participante liesen d'Informatioune léiwer op Pabeier ewéi online. Nëmmen 6 % liesen d’Informatioune léiwer an digitaler Form.

Mir hunn all d‘Verbesserungsvirschléi mat vill Opmierksamkeet gelies a wäerten déi am heefegst genannte schonn ab der nächster Editioun ëmsetzen. 

• En Opruff u Veräiner, Sportsklibb, Museksgruppen, Kulturschaffend, markant Perséinlechkeeten aus den Dierfer, Bierger mat enger besonnescher Erfarung, auslännesch Matbierger a Betriber, fir un enger Reportage matzemaachen.
• Den Deel mat den Aktualitéiten aus eise Gemengen ausbauen.
• An all Editioun e Kräizworträtsel mat engem klenge Gewënnspill ubidden.
• Méi dacks eng franséisch Versioun vun Artikelen iwwer e QR-Code zur Verfügung stellen.
• Méi dacks en Trëppelwee aus dem Kanton virstellen.
• Méi reegelméisseg e Sportsveräin aus dem Kanton virstellen.

Wat de Moment net méiglech ass: 

• Méi Editiounen pro Joer: Wéinst den héije Käschte fir Drock a Verdeelung ass dat de Moment leider net realistesch.
• Eng däitlech Reduktioun vun der Säitenzuel: Mir probéieren d'Säitenzuel bei all Editioun esou niddreg wéi méiglech ze halen. Wéinst de ville Bäiträg an de franséischen Iwwersetzunge bleift eng däitlech Reduktioun awer de Moment net méiglech.
• Op Reklamme verzichten: Et ass eis wichteg, eise lokale Betriber eng Plattform ze bidden, fir sech virzestellen. Gläichzäiteg droen d'Recetten aus de Reklammen dozou bäi, e wichtegen Deel vun de Käschte vum Magazine ze finanzéieren.

D'Resultater weisen, datt de Magazine bei de Lieser gutt ukënnt. Gläichzäiteg hu vill Participanten eis wäertvoll Iddie ginn, déi mir versichen ëmzesetzen. Merci fir Ärt Matmaachen an Äert Vertrauen a mir freeën eis, de Magazine zesumme mat Iech wieder z‘entwéckelen.