Nei Stroumnetzkäschten – Wat muss ech wëssen?

Firwat sinn nei Netzkäschten agefouert ginn?

Zënter dem 1. Januar 2025 gëllt eng nei Tarifstruktur fir d’Notzung vum Stroumnetz. D’Zil ass et, d’Stroumnetz ze entlaaschten, also staark Spëtze beim Verbrauch ze vermeiden, an d’Netz méi effizient ze notzen.

D’Käschte fir d’Netznotzung ginn elo nom Impakt, deen de Benotzer op d’Stroumnetz huet, berechent. Esou kënnen d’Käschte méi gerecht verdeelt ginn, an de Verbraucher soll zu méi engem flexibele Verhale motivéiert ginn.

Wéi setzt sech de Stroumpräis zesummen?

De Stroumpräis besteet aus 3 Deeler: 

• dem Energiepräis, 
• dem Netznotzungstarif 
• de Steieren / Taxen

Déi rezent Ännerung betrëfft ausschliisslech den Netznotzungstarif. Dësen Tarif deckt d’Käschte fir d’Stroumnetz of – also fir de Bau, den Ënnerhalt an de Betrib vum Netz.

Wat ännert sech elo konkret?

All Stroumkonsument gëtt op Basis vu sengem Stroumverbrauch vun de leschten 12 Méint an eng sougenannt Referenzleeschtungsklass (RLK) agestuuft. 
Bei neie Cliente gëtt eng Standard-RLK geholl.  

Wat ass eng „Referenzleeschtung“?  

D’Referenzleeschtung entsprécht enger Schwell, déi vum Netzbedreiwer festgeluecht ginn ass. 
Wann Däi Verbrauch dës Schwell iwwerschreit, d.h. wann‘s Du zu engem Moment ze vill Stroum zur selwechter Zäit verbrauchs, da musst Du en Zouschlag bezuelen.  

Dësen Zouschlag gëtt nëmmen op däer Stroumquantitéit berechent, déi iwwert Denger festgeluechter Schwell läit. 
Dëst soll d’Clienten dozou motivéieren, net ze vill Elektrogeräter gläichzäiteg unzeschalte fir Spëtzen ze vermeiden.

Déi aacht verschidde Referenzleeschtungsklassen (RLK) si follgend: 

3 kW, 7 kW, 12 kW, 17 kW, 27 kW, 43 kW, 70 kW a 100 kW.

Wéi fannen ech meng Referenzleeschtungsklass eraus?  

Zënter Januar 2025 steet Deng RLK op der Stroumrechnung.  

Wéi setzt sech den Netznotzungstarif zesummen?  

De Präis fir d’Benotze vum Stroumnetz – also de sougenannte Netznotzungstarif – setzt sech aus zwee Deeler zesummen:

• E fixe Bestanddeel 
  Dat ass eng Grondtax, déi‘s du all Mount bezils. Wéi héich dës Tax ass, hänkt vun Denger RLK of.
• E variable Bestanddeel 
  Dëse besteet aus zwou Komponenten:
  • Arbechtspräis (€/kWh): Dësen Tarif bezills Du fir all Kilowattstonn Stroum, deen‘s Du aus dem Netz zitts.
  • Zouschlag fir Depassementer (€/kWh): Wann’s Du méi Stroum verbrauchs, wéi fir Deng RLK virgesinn ass, kënnt en zousätzlechen Oppräis drop. 

Wat wier, wa sech mäi Verbrauch ännert?

Deng Referenzleeschtungsklass (RLK) gëtt all Mount automatesch nei berechent - op Basis vun Dengem Stroumverbrauch vun de leschten 12 Méint. Doduerch ginn och rezent Ännerungen an Dengem Verhale berücksichtegt.  

Fir d’Berechnung, gëtt gekuckt, wéi eng vun den 8 RLK fir Dech am bëllegsten ass. Et ass also net néideg, eng Upassung unzefroen, wann et just ëm kleng Ännerunge geet.

Source: CREOS, Leitfaden- Neue Tarifstruktur für das Niederspannungsstromnetz

Wat geschitt, wann ech mer en Elektro-Auto oder eng Wärmepompel uschafen? 

Wann’s Du Däi Stroumverbrauch staark erhéichs – zum Beispill duerch en neien Elektroauto oder eng Wärmepompel – ass et ubruecht, proaktiv eng Upassung vun Denger RLK unzefroen, fir net bei der nächster Stroumrechnung eng Iwwerraschung ze erliewen.

Fir dat ze maachen, stellt Creos e prakteschen Online-Tool zur Verfügung, mat deem‘s Du eng sënnvoll Upassung simuléiere kanns: 

Wat kann ech maache fir keng Depassementer ze kréien? 

Hei puer Tipps, fir ze verhënneren, dass’s Du Deng RLK iwwerschrëtts:

• Net all d‘Geräter gläichzäiteg lafe loossen: Verdeel d’Notzung vun Dengen energieintensive Geräter (Wäschmaschinn, Trockner, Luedstatioun asw.) iwwer den Dag.
• Luedleeschtung vum Elektroauto limitéieren: Vill Wallboxen/Autoen erlaben et, d’Leeschtung ze drosselen
• Photovoltaik-Anlag + Batterie: Mat enger Solaranlag an engem Akku kanns Du selwer Stroum produzéieren a späicheren. Doduerch verbrauchs Du manner Stroum aus dem Netz. Als Beispill, wann’s Du eng 10kWp-Anlag hues, produzéiert déi am Summer jee no Wieder tëscht 6 an 10 kW, am Wanter bei optimale Bedingunge bis zu 4 kW. 

Kanton Réiden Environnement
43, Grand-Rue
L-8510 Redange
T. 28 33 44  
environnement@kanton-reiden.lu
www.environnement.kanton-reiden.lu