Reewaasser-Anlag – Alles wat Dir wësse musst

Wat bréngt eng Reewaasser-Anlag? Wat kascht et? Ass et méiglech an engem bestoenden Haus eng nodréiglech ze bauen?

All dës Froe gëtt eisen Energieberoder ëmmer rëm gestallt, besonnesch wann de Waasserpräis erop geet. Mir versichen hei op déi heefegst vun de Froen anzegoen.  

Wat ass genau eng Reewaasser-Anlag?

Et ass ee - meeschtens ënnerierdesche - Behälter, deen d’Reewaasser sammelt fir et ze späicheren. D’Reewaasser gëtt vum Daach an dëse Behälter geleet. D’Reewaasser kann da fir verschidden Zwecker benotzt ginn: fir d’Bewässerung vum Gaart, d’Toilettespülung oder d’Wäschmaschinn. Et kann awer net als Drénkwaasser genotzt ginn, wëll et ongefiltert net propper genuch ass.  

Wat sinn d’Virdeeler vun enger Reewaasser-Anlag?

• Waasser spueren: Am Duerchschnëtt kënnt Dir bis zu 50% vun ärem deeglechen Drénkwaasserverbrauch mat Reewaasser decken.  
• Käschte verréngeren: Manner Drénkwaasser bedeit eng manner héich Waasser- a Kanalrechnung.  
• Ëmweltschutz: Duerch d’Notze vu Reewaasser schount Dir déi natierlech Ressourcen.
• Héichwasserschutz: Reewaasserbehälteren entlaaschte bei Staarkreen d’Kanalisatioun, wëll se d’Waasser zréckhalen.  

Muss ech wéinst enger Reewaasser-Anlag méi Ofwaasser-Taxe bezuelen?

Neen, zu Lëtzebuerg bezuelt Dir näischt fir d’Aleedung vu Reewaasser an déi ëffentlech Kanalisatioun. D’Ofwaasser-Käschte baséieren nämlech nëmmen op dem gemoossenen Drénkwaasserverbrauch.  

Mat enger Reewaasser-Anlag spuert Dir zousätzlech Ofwaasser-Käschten, well Dir jo manner Drénkwaasser verbraucht.  

Ass et och méiglech an engem bestoenden Haus eng Anlag anzebauen?

Jo, et wier am Prinzip méiglech, mee natierlech méi opwänneg wéi am Neibau. Loosst d‘Machbarkeet vun engem Fachbetrib préiwen. Et brauch nämlech zwee verschidde Leitungssystemer (Drénkwaasser & Reewaasser), déi zB un Är Toilette oder Wäschmaschinn ugeschloss ginn. Dir braucht och Plaz am Haus fir déi néideg technesch Installatiounen.  

Kann een eng finanziell Ënnerstëtzung vum Staat fir eng Reewaasser-Anlag kréien?

Jo, wann Dir d‘Conditioune vum Staat erfëllt, kënnt Dir eng finanziell Hëllef vu 25% vun de Käschte kréien, mat engem Plaffong vun 1.000€.  

Méi Informatiounen an déi genau Conditioune fannt Dir um Site vum guichet.lu

Ginn eis Gemengen och nach zousätzlech Subsiden?

Jo, all d’Gemengen aus eisem Kanton ginn nach kommunal Subsiden, déi jee no Gemeng tëscht 100% an 150% vun der Staat-Subventioun leien.  

Wat spueren ech konkret mat enger Reewaasser-Anlag?

D’Aspuerunge goufen unhand vun Duerchschnëttswäerter pro Persoun a Joer berechent: 6-7l/Toilettegang (5x am Dag) an 2-3 Wäsche pro Woch à 50l. De Präis fir Drénk- an Ofwaasser zu Lëtzebuerg läit bei 5€/m3.  

Wéi opwänneg ass den Entretien vun enger Reewaasser-Anlag?

Zum einfachen Entretien, dee vun de Besëtzer selwer ka gemaach ginn, zielen:

•  Zoulaf-Filter kontrolléieren a botzen, ca. all 6 Méint
•  Préiwen, ob sech Oflagerungen, Geroch oder Alge gebilt hunn

Aner méi komplex Aarbechte sinn:  

• De Behälter all 5-10 Joer botzen (de Buedem vu Sedimenter befreien)
• Pompel, Steierung an Iwwerlaf kontrolléieren  

Wat kascht eng Anlag zu Lëtzebuerg?

D’Gesamtkäschte fir eng Reewaasser-Anlag leien zu Lëtzebuerg beim Neibau ënner 10.000€, bei engem besteeënden Haus ënner 20.000€, ofhängeg vum Ëmfang an Opwand  

Wéi kann ech soss Waasser spueren?

Och e Reewaassertank, deen net u d’Haus ugeschloss ass, bréngt scho vill. Dat gesammelt Waasser eegent sech ideal fir de Gaart ze nätzen, den Auto ze wäschen oder fir den Hochdruckreiniger. Schonn ee 500-1000 Liter-Tank mécht eppes aus a spuert wäertvollt Drénkwaasser – ouni groussen Opwand.  

Kontakt:

Kanton Réiden Service Environnement – Conseil en Energie
43, Grand-Rue
L-8510 Redange
+ 352 28 33 44
environnement@kanton-reiden.lu