Fierkelsmaart 2025: Sonndeg, de 6. Abrëll zu Rammerich

De Fierkelsmaart ass mëttlerweil eng richteg Traditioun an der Gemeng Rammerich. De Maart dauert de ganze Sonnde vun 10:00 Auer bis an d'Nuecht eran an zitt all Joer dausende vu Visiteuren un. Mir hunn der Rammericher Buergermeeschtesch Myriam Binck, Initiatrice vun dësem Maart, e puer Froe gestallt.  

Firwat Fierkelsmaart, kann ech do e Fierkel kafen?

Neen, de Fierkelsmaart vun haut ass keen Déieremaart méi. Den Numm kënnt vu fréier, wou d’Rammericher Mäert riseg Véi-Mäert waren. Dëst ware richteg Volleksfester, déi landeswäit bekannt waren an enorm vill Mënschen ugezunn hunn.  

Wou läit de Schwéierpunkt haut?

Haut ass et virun allem e gesellege Maart mat ville verschiddene Stänn, wou d’Familljen am Vierdergrond stinn. De Fierkelsmaart ass fir Kleng a Grouss mat gratis Kanneranimatiounen a faire Präisser.

Wéi vill Stänn sinn um Fierkelsmaart präsent?

Dir kënnt Iech op 125 Stänn aus de verschiddenste Beräicher freeën:

• Eng grouss Auswiel u Stänn géint den Honger an Duuscht
• Vill Stänn mat regionalen a lokale Produiten
• Hobby-Kënschtler mat hiren eenzegaartege Kreatiounen
• Informatiouns-Stänn zu ënnerschiddlechen Themen
• Eng Heedewull u Kanneraktivitéiten  
• Live-Musik, déi natierlech net  däerf feelen

Wat gëtt fir d’Kanner gebueden?

Mir bidden eng ganz Rei gratis Kanneraktivitéiten un: vum Face-Painting bis zum Schnëtzatelier ass fir all Alter eppes derbäi!  

Och dëst Joer ass nees den After-Fierkelsmaart!

Ab 18:00 Auer fënnt eisen After-Fierkelsmaart statt, bei deem de Grupp The Noisemakers fir Stëmmung suergt.

Wou fannen ech méi Informatiounen (Kanneranimatioun, Musik, Iessen, Navette)? 

All Detailer fannt Dir hei an der Broschür: