En neie Kach fir de Foyer de Jour A Butzen !

Zënter dem 1. Februar verwinnt de Stefan Jost eis Butzen aus den zwou kantonale Crèchen mat senger Kachkonscht. Mat engem spannende Parcours duerch déi verschiddenste Kichen bréngt hien eng breet Erfarung mat. A wat ass him beim Kache fir d’Butzen besonnesch wichteg? Dat verréit hien eis an dësem Gespréich!

Kanns Du Dech w.e.g. kuerz virstellen?

Ech sinn de Stefan Jost, 46 Joer, wunnen am Préizerdaul, si bestuet a Papp vun 2 Bouwe (5 a 9 Joer). Mäin DAP als Kach hunn ech an der Hotelschoul Ter Duinen an der Belsch ofgeschloss.

Wat ware bis elo Deng berufflech Statiounen?

Ech hunn a Restauranten an der Belsch, Däitschland a Lëtzebuerg geschafft. Een Highlight war am Hotel Royal an der Stad ze schaffen, wou ech vum Commis de Cuisine bis zum Chef de Partie all d’Statiounen duerchgaang sinn. Déi lescht 12 Joer hunn ech fir d’Bewunner vum Altersheem zu Réiden gekacht.

Wat huet Dech bei d’Butze bruecht?

Meng Kanner waren an dëser Crèche, dofir hunn ech déi sympathesch Equipe vun A Butzen scho kannt. Déi familljefrëndlech Aarbechtszäiten an d’Méiglechkeet mat Kanner ze kachen, hu mech bei dësem Posten ugezunn.

Wat fir ee Plat kënnt bei de Butze gutt un?

Nuddelen a gebrodene Räis mat klengem Geméis a Poulet si beléift. All Kand huet säi Liblingsiessen – meng zwee iessen zum Beispill gäre Fësch, eppes, wat mech iwwerrascht huet!

Wat ass Dir beim Kache fir d‘Butze wichteg?

Ech schaffen sou vill wéi méiglech mat regionale a saisonale Produite vu gudder Qualitéit.

Wéi suergs Du fir eng equilibréiert Ernärung?

Mat engem variéierte Menu, dee vill Uebst a Geméis, Vollkornproduiten, Lënsen, a Bounen a gesond Fetter enthält. Haaptsaach frësch ouni Zousazstoffer, oder Geschmaachsverstäerker, an ouni ze vill Salz oder Zocker.

Hues Du Pläng fir d’Kanner an d’Kachen anzebezéien?

Jo! Kleng Platen zesumme preparéieren, gesond Produiten entdecken an de Kanner weisen, wou d’Liewensmëttel hierkommen. Et mécht Spaass, ze gesinn, wéi si hir Hänn an e Kuchendeeg stiechen oder zécke fir een Ee opzeschloen !

Wat méchs Du gären an Denger Fräizäit?

Mountainbike, wanderen a Schifueren.

Wat ass Däi Liblingsplat?

Ech hu kee Liblingplat. Ech entdecke gären Neies an hu gär Ofwiesslung. Ech gin gären e Rezept mat op de Wee: Dos de Cabillaud mat Chorizo-Crumble a Püree vun der Pastinak.

Mir si ganz frou, dass de Stefan Jost de Wee an d’Crèche A Butzen fonnt huet a wënschen him nëmmen dat Bescht a vill Freed mat senger neier Aufgab!