Réidener Jugendtreff

Wann Europa sech zu Houltz begéint: eng Woch, déi 40 Jonker verännert huet

Veröffentlicht: 17/08/2026 - 09:43

Aktualisiert: 17/08/2026 - 10:12

3 Minuten

Vum 9. bis de 16. Juli hu 40 Jonker aus Lëtzebuerg, Frankräich, Italien an der Belsch eng Woch voller Entdeckungen, Kreativitéit a flotten Treffen um Camping Héiltzerstee verbruecht. Dësen Erasmus+-Projet huet hinnen d'Méiglechkeet ginn, Kontakter mat anere jonken Europäer ze knäppen, nei Kulturen kennenzeléieren an eng eemoleg mënschlech Erfarung an engem oppenen, inklusiven a séchere Kader ze maachen. Matzen an der Natur huet de Camping zu Houltz et de Jonken erméiglecht, bewosst Distanz vun den Ecranen ze huelen an sech nees op dat Wesentlecht ze konzentréieren.

Iwwerzeegt dovun, datt kulturell, kënschtleresch a sportlech Aktivitéite vill zur perséinlecher Entwécklung bäidroen, haten d'Organisateuren en ofwiesslungsräichen a beräicherende Programm op d'Been gestallt.

Danz, Musek, Video, Capoeira, Yoga, Fitness, Molerei, Modelléieren, Bitzen oder Kickboxen: Jidderee konnt nei Talenter entdecken, senger Kreativitéit fräie Laf loossen an onvergiesslech Erfarunge sammelen. Déi lëtzebuergesch Jonk hunn och aktiv bei der Gestaltung vun den Owender matgemaach an ënner anerem grouss Spiller, Lagerfeieren an Nuetsspiller organiséiert. Improviséiert Jam Sessions, Waasserspiller, Gespréicher an déi vill geselleg Momenter hunn dozou bäigedroen, datt d'Participante sech ëmmer méi no komm sinn.

Mee iwwer all dës Aktivitéiten eraus wäert virun allem deen aussergewéinlechen Zesummenhalt tëscht de 40 Jonken an den 10 Educateuren an Erënnerung bleiwen. Schonn no den éischten Deeg war aus de Participanten eng richteg Gemeinschaft ginn. Dës Verbondenheet ass am Laf vun der Woch ëmmer méi gewuess – wat ee spéitstens beim besonnesch emotionale Abschid gespuert huet.

Dëse grousse Succès ass och dem Engagement vu sechs jonke Lëtzebuerger ze verdanken, déi am Kader vun hirer Formatioun zum Animateur B, ënnert der Koordinatioun vum Maïté Schroeder, e groussen Deel vun der Animatioun iwwerholl hunn. Mat hirem Engagement, hirer Dynamik an hirem Verantwortungsbewosstsinn hu si entscheedend zum Gelénge vum Camp bäigedroen.

Elo hoffen all d'Participanten, datt dës Aventure eng Fortsetzung kritt – vläicht an Italien, an der Belsch oder a Frankräich. Well iwwer d'Grenzen eraus sinn esou Austauschprojeten eng richteg Schoul fir d'Liewen. Si fërderen d'Zesummeliewen, d'Oppenheet fir anerer, d'Solidaritéit, d'Kreativitéit, d'Selbststännegkeet an d'Eegeninitiativ.

E ganz grousse Merci geet un de Programm Erasmus+ fir déi wäertvoll finanziell Ënnerstëtzung, ouni déi dëse Projet net méiglech gewiescht wier. Eise Merci geet och un de Camping Héiltzerstee fir deen häerzlechen Empfang, un eis Directrice Martine Thielmanns fir hiert Vertrauen, grad ewéi un d'Familljen, d'Educateuren, d'Animateuren an all d'Partner, déi dozou bäigedroen hunn, dës Woch zu engem vollen Erfolleg ze maachen.

Eise gréisste Merci gëllt awer deene Jonken. Mat hirer Begeeschterung, hirem Virwëtz, hirer Oppenheet fir anerer an hirer ustiechender Energie hu si dësem Projet seng ganz mënschlech Räichhaltegkeet ginn. Mir hoffen, datt si dëse Geescht vum Deelen, vum Respekt a vun der Entdeckungsfreed, deen dës Woch gepräägt huet, nach laang bäibehale wäerten.
Wa méi Jonker d'Méiglechkeet kréichen, un esou Austauschprojeten deelzehuelen, géifen dës ouni Zweiwel dozou bäidroen, eng méi oppen, méi solidaresch a méi mënschlech Gesellschaft ze gestalten.