Een interessante Klausur-Dag iwwer Zukunft vum Kanton Réiden

Zënter 2022 schaffen déi 9 Gemenge vum Kanton Réiden zesumme mam Syndikat Kanton Réiden ënnert der Leedung vum Landesplanungsministère un enger Zukunftsvisioun (2035/2050).

An deem Kader goufen all d’Schäfferéit aus eisen 9 Gemengen Samschdes den 1. Februar an d’Biekerecher Millen op e Klausur-Dag invitéiert. D’Zil vun dësem Dag war fir un der gemeinsamer Visioun vum Kanton Réiden ze feilen an déi verschidden Handlungsfelder festzeleeën. 
Praktesch all Schäfferéit aus eisen 9 Gemenge ware präsent. No enger kuerzer Begréissung vum Präsident vum Kanton Réiden, dem Thierry Lagoda, hunn d’Vertrieder vum Landesplanungsministère an d’Thematik agefouert. Uschléissend ass fläisseg a Gruppe geschafft ginn, wou déi verschidden Handlungsfelder verdéift gi sinn. Zum Schluss vum Dag huet all Grupp e Resumé vu sengen Diskussiounen virgestallt.

Et goufen insgesamt 5 Handlungsfelder definéiert, dobäi spillt d’Handlungsfeld vun der Gouvernance, also d’Organisatioun an d’Struktur, eng iwwergräifend an zentral Roll. Déi aner 4 Handlungsfelder sinn: 

• Den zouverlässege Kanton: Qualitativ héichwäerteg Servicer a modern Infrastrukturen am ländleche Raum.
• De liewenswäerte Kanton: Flächespuerend a zukunftsfäheg Regionalentwécklung, déi de ländleche Charakter respektéiert. Lieweg Dierfer mat aktiver Biergerbedeelegung an den Entscheedungsprozesser.
• De vernetzte Kanton: E Kanton mat kuerze Weeër, intermodal vernetzt a gutt ugebonne mam Bus. Sécher & direkt Vëlosverbindungen. Slow-Tourismus-Regioun a eng der Regioun ugepassten Digitaliséierung.
• De resiliente Kanton: Energieautarkie a Klima-Upassung. Schutz vun natierleche Ressourcen, dorënner Waasser, Gréngräim an d’lokal Iessproduktioun.

Fir all Handlungsfeld si Projete proposéiert ginn, déi hëllefen dës Visiounen z'erreechen.

Elo ginn all déi virgeschloen Iddien an Ännerunge vun eise Politiker an d'Visioun agebaut fir se uschléissend alle Gemengeréit aus dem Kanton virzestellen.