Mir stellen eis Repairer vir!

De Jacques Gilbert vu Räichel ass zënter den Ufäng beim Repair Café Kanton Réiden dobäi a léisst sech kee Rendez-vous entgoen.

Jacques, kanns du dech an e puer Wierder virstellen?

Ech sinn Ingenieur an der Pensioun a war schonn ëmmer e passionéierte Bastler. Ech hunn ëmmer gär Saachen auserneegeholl, fir ze verstoen, wéi se funktionéieren. Dat Wëssen hëlleft mir haut, Apparater ze flécken, wann se net méi richteg funktionéieren.

A wéi engem Beräich bass du beim Repair Café aktiv?

Ech këmmere mech haaptsächlech ëm elektromechanesch Apparater, wéi zum Beispill Staubsauger oder Kaffismaschinnen.

Wéi eng Saache flécks du am léifsten? A wéi eng manner gär? Firwat?

Ech hu keng besonnesch Virléiften. Am léifste flécken ech awer Saachen, déi net ze vill Zäit an Usproch huelen. Esou kann ech méiglechst ville Leit hëllefen.

Wat mécht dir bei dengem Engagement am Repair Café am meeschte Freed?

Ech schätzen déi gemittlech Atmosphär an déi géigesäiteg Hëllef ënnert de Repairer. An natierlech ass et ëmmer nees schéin, wann d'Leit mat engem Laachen an hirem gefléckten Apparat nees heemginn.

Gëtt et e Message, deen s du eise Lieser mat op de Wee gi wëlls?

Jidderee ka Repairer ginn, jiddereen op sengem Niveau. D'Repair Caféë sinn och Plazen, wou ee vill bäiléiere kann. Wien en Apparat matbréngt a beim Flécke matschafft, kann dobäi nei Fäegkeeten entwéckelen an eppes fir d'Zukunft léieren.