Fit an d’Joer 2025: Maacht mat bei de Lafevents am Kanton Réiden!

No de Feierdeeg, wou gutt Iessen, Fondueowender an de leckeren Schokela eis den Dag verséissen, gëtt et näischt Besseres, wéi nees richteg an d’Beweegung ze kommen. Mir hunn déi perfekt Léisung fir d’Iwwerschosskalorien lasszeginn an d’Joer mat engem sportlechen Zil unzefänken!

Ab Enn Dezember 2024 lueden Lafevents Iech all an, egal ob Dir nach just ufänkt oder scho lafgewand sidd. Dës Evenementer sinn eng super Geleeënheet, fir Iech z’erhalen, fir frësch Loft ze tanken an zesumme Spaass ze hunn.

41. Sylvesterlaf zu Rammerich, Dënschdes den 31. Dezember 2024

Dënschdes den 31. Dezember fënnt den 41. Sylvesterlaf zu Rammerich statt. Organiséiert vun der Entente Sylvesterlaf '84, versprécht dësen traditionelle Laf e sportlechen a spannende Start an dat neit Joer.

De Startschoss fir den 10km Stroosselaf ass um 15h00 virun der Rammericher Gemeng. 
Verfleegung gëtt et bei 3,5km, 6,8km a am Zil. D’Pré-inscriptioun virum 26. Dezember kascht 15€, op der Plaz bis 14h00 20€.

Fir d’Kanner ginn et extra Strecken:

• 5-9 Joer: 900m   Départ um 14h10 (ouni Chrono)
• 10-13 Joer: 1800m Départ um 14h25 (mat Chrono)

De Kannerlaf ass gratis!

Méi Informatiounen an Umeldung ënner: www.sylvesterlaf.lu oder via E-Mail un info@sylvesterlaf.lu.

De Réidener Wanterlaf, Sonndes den 5. Januar 2025

Sonndes, de 5. Januar fënnt déi 17. Editioun vum Réidener Wanterlaf zu Réiden am Atert-Lycée statt. 

Et gi 6, 10, 14 a 19 Kilometer ugebueden, déi entweeder kënne spadséiert (Depart: 8h45) oder gelaf (Depart: 10h00) ginn, alles ouni Chrono. Fir d'Verfleegung ënnerwee a bei der Arrivée ass beschtens gesuergt.

Pré-Inscriptioun bis de 26.12 iwwer www.4runner.lu oder sur place, Samsdes 04.01 vun 14h00 bis 17h00 a Sonndes 05.01 ab 8h00.

Lafen am Wëlle Westen (LAWW)

De Grupp vum LAWW trëfft sech all Dënschden um 18:45 fir 5-10 km zesummen ze lafen. 

Fir ween?

De Laftreff ass oppe fir jiddereen, vum Ufänger bis zum erfuerene Leefer. Ufänger kréie laftechnesch Tips. Déi méi séier kommen och op hir Käschten.

Wou? 

D’Strecken, déi sech ëmmer am Kanton Réiden befannen, sinn dem Wieder ugepasst an ginn am Virfeld kommunizéiert. LAWW mécht och bei Lafcoursen zu Lëtzebuerg an am Ausland mat.

Méi Info? 

• Strava (Club: Lafen am welle Westen)
• Instagram (Lafen_am_welle_Westen)
• Facebook (Lafen Am Welle Westen) 
• E-mail : lafengenwesten@gmx.de