D'Äerdschëff: En Treffpunkt fir d'Regioun

Vill Leit fuere bal all Dag beim Äerdschëff zu Réiden laanscht, ouni genee ze wëssen, wat sech dohannert verstoppt. Dobäi ass et vill méi wéi en aussergewéinlecht Gebai. Et ass eng Plaz, wou nohaltegt Bauen a Liewen, gemeinsaamt Léieren an innovativ Iddien zesummekommen. Mir hu mam Sophie Pixius geschwat, dat sech dofir asetzt, d'Äerdschëff nach méi an eiser Regioun ze verankeren.

Sophie, kanns du dech kuerz virstellen? 

Ech wunnen zu Réiden zesumme mat mengem Partner an eisen dräi Kanner an engem intergenerationellen Haus mat mengen Elteren. Nom Studium vun der Anthropologie an Development Studies hunn ech eng Zäit am Peru gelieft. Do hunn ech meng Passioun fir Naturschutz an nohalteg Landwirtschaft entdeckt an e Master an der Agrarökologie gemaach. Zréck zu Lëtzebuerg hunn ech zesumme mat zwee Kolleegen d'Kooperativ TERRA um Eecherfeld gegrënnt. Do baue mir zënter 2014 mat eiser solidarescher Landwirtschaft Geméis u fir ronn 200 Familljen. 

Wat huet dech motivéiert, elo och nach beim Äerdschëff matzeschaffen?

D'Äerdschëff läit mir um Häerz an ech hunn et säit senger Grënnung suivéiert. Ech wënschen mir, dass et zu engem liewege Projet gëtt, deen d'Awunner aus eiser Regioun inspiréiert an zesummebréngt. Meng Aufgab ass et, d'Äerdschëff am Wëlle Westen méi bekannt ze maachen. Ech schaffen dofir fënnef Stonnen d'Woch am Kader vun engem LEADER-finanzéierte Projet.

Fir déi, déi d'Äerdschëff nach net kennen: Wat ass dat eigentlech?

D'Äerdschëff ass en innovativt Gebai, dat bal komplett autonom funktionéiert. Eist Äerdschëff notzt d'Sonn an de Wand als Energiequell, sammelt a filtert Reewaasser, a behandelt säin Ofwaasser op der Plaz. D'Äerdschëff gouf gréisstendeels aus natierlechen, lokalen a recycléierte Materialie wärend engem partizipative Chantier vu Fräiwëllege gebaut. D'Äerdschëff ass eng experimentell Léierplaz fir radikal nohalteg Usätz a Léisungen. 

Wéi wëlls du virgoe fir d'Äerdschëff méi hei ze verankeren?

Mir wëllen Atelieren, Konferenzen, Film- a Spillowenter, Theaterstécker a Kënschtlerresidenzen organiséieren. Mat dësen Aktivitéite wëlle mir d'Leit zesummebréngen an hinnen Iddien a konkret Beispiller fir eng méi nohalteg Liewensweis mat op de Wee ginn.

Fir wéi eng Wäerter steet d'Äerdschëff? 

Mir gleewen un eng einfach, gerecht an nohalteg Liewensweis, als Alternativ zu héich komplexen Technologien, zum Iwwerkonsum, der Wegwerfgesellschaft, an enger ëmmer méi grousser globaler Ofhängegkeet. Mir setzen op Reparéieren, op lokal, kreativ Léisungen an op e bewossten Ëmgang mat de Ressourcen. Dobäi stinn Zesummenhalt an e respektvollen Ëmgang mat der Natur am Mëttelpunkt. 

Wéi gesäis du d'Zukunft vum Äerdschëff? 

Ech hoffen, datt d'Äerdschëff sech zu engem oppenen Treffpunkt fir d'Regioun entwéckelt. Eng Plaz, wou jidderee wëllkomm ass, sech iwwer eng nohalteg Liewensweis informéiere kann, sech mat anere Mënschen austauscht, iwwer de Site spadséiert oder bei enger flotter Aktivitéit matmécht. 

Wat ass däi Message un d’Lieser ?

Kommt laanscht, entdeckt de Site a maacht bei eisen Aktivitéite mat, mir freeën eis op Äre Besuch! Mir si gläichzäiteg och oppe fir Zesummenaarbechte mat Veräiner, Schoulen an aneren Acteuren aus der Regioun. Wien eng Iddi huet oder eng Aktivitéit an engem inspiréierende Kader organiséiere wëll, ass häerzlech wëllkomm

Kontakt

Äerdschëff
1, rue du Lycée
L-8508 Redange/Attert

sophie@aerdscheff.lu
www.aerdscheff.lu