Klimapakt-Dag 2026: Véier Gemengen aus dem Kanton Réiden ausgezeechent

Den 8. Mee 2026 hunn am Cercle Cité an der Stad Lëtzebuerg véier Gemengen aus dem Kanton Réiden hier Klimapakt-Zertifizéierungstrophäe aus den Hänn vum Minister Serge Wilmes entgéint geholl.

Dës Auszeechnung belount déi kontinuéierlech Efforten, déi d’Bevëlkerung, d’Gemengepersonal an déi politesch Responsabel zënter ville Joren am Kampf géint de Klimawandel leeschten.

D’Gemenge Biekerech an Ell hunn allebéid d’Zertifizéierung Gold mat engem Resultat vun 82 % beim Audit kritt. D’Gemenge Sëll a Réiden hunn hirersäits d’Zertifizéierung Silver erreecht, mat respektiv 73 % an 68 % beim Audit.

D’Gemeng  Biekerech konnt domat hiert schonn exzellent Resultat vun 2023 behalen, wärend d’Gemengen Ell, Sëll a Réiden an de leschten dräi Joer eng bemierkenswäert Verbesserung vu ronn 8 % erreecht hunn.

Dës Resultater weisen nach eng Kéier däitlech, datt de Kanton Réiden sech duerch dat grousst Engagement vu senger Bevëlkerung, senge Gemengeservicer an de politesche Responsabele fir de Klimaschutz an d’Energietransitioun asetzt.