Summerfest an der Réidener Groussgaass, Samschdes, de 4. Juli 

Samschdes, de 4. Juli steet d'Réidener Groussgaass vun 10h00 bis 18h00 ganz am Zeeche vum Summerfest, dat vun der Union Commerciale et Artisanale Réiden an der asbl Maartstëmmung Réiden organiséiert gëtt.  

Déi lokal Geschäfter maachen hir Dieren op a lackele mat gudden Affären a spezielle Braderie-Präisser. Nieft de Butteker wäerten och vill zousätzlech Verkafsstänn an der Groussgaass opgeriicht sinn, soudatt fir all Goût eppes dobäi ass. 

Och fir dat kulinarescht Wuel ass beschtens gesuergt. Verschidde Stänn bidden Iessen a Gedrénks un. 

Fir déi richteg Feststëmmung suerge Concerten a Live-Bands, déi de ganzen Dag iwwer fir musikalesch Animatioun garantéieren. 

Och déi jéngst Gäscht kommen net ze kuerz: Mat enger spezieller Kanneranimatioun (Sprangschlass, Facepainting,…) ass och fir Spaass a Beschäftegung vun de Kanner gesuergt. 

D'Summerfest ass domat déi ideal Geleeënheet, fir déi lokal Geschäfter z'ënnerstëtzen, flott Schnäppchen ze maachen an e puer geselleg Stonnen zu Réiden ze verbréngen.