Grousseltere ginn, Grousseltere sinn

Eng flott Soirée mat der Eltereschoul am Kader vun eisem Projet JU-SE " Ee fir den aneren do"

De 5. Mee vu 16:00 bis 18:00 Auer am Centre Camille Ney zu Ell

Et gëtt een net als Grousseltere gebuer – Grousseltereschaft haut: biologesch a sozial Bezéiungen

D’Roll vun de Grousselteren huet sech an de leschte Joerzéngte staark verännert. An enger Gesellschaft, déi duerch nei Familljekonstellatiounen, kulturell Diversitéit an eng verlängert Liewensdauer gepräägt ass, kritt d’Grousseltereschaft nei Bedeitungen.

Nieft de biologesche Grousselteren entstinn ëmmer méi Häerzensgrousselteren (Grand-parents de cœur): Bezéiungspersounen, déi Kanner iwwer Zäit begleeden, ënnerstëtzen a mat Opmierksamkeet, Präsenz a Zouverlässegkeet do sinn. Dës intergenerationell Bezéiunge baséieren net op Famill, mee op sozialer a mënschlecher Verbonnenheet.

Am Kader vun dëser Aktivitéit gëtt e Bléck op d’Grousseltereschaft hautdesdaags geworf: op d’Vilfalt vun de Rollen, d’Erwaardungen u Grousselteren an hir eegen Erwaardungen, souwéi op d’Bedeitung vun der Bezéiung tëscht Grousselteren an Enkelkanner – fir béid Säiten.

Besonnesch thematiséiert ginn dobäi intergenerationell an interkulturell Bezéiungen als wichtege Pilier vum Vivre Ensemble. Si droen zu Zesummenhalt, Solidaritéit a géigesäitegem Verstoe bäi a weisen, datt Bezéiung net nëmmen duerch biologesch Bande, mee duerch Engagement, Respekt a Vertrauen entsteet.