Repair Café Kanton Réiden

Gutt besichte Repair Café zu Osper mat Hëllef vun der Asbl Gudd Noperen

Veröffentlicht: 24/03/2026 - 11:00

Aktualisiert: 27/03/2026 - 11:15

1 Minute

E Samschde 14. Mäerz huet de Syndicat Intercommunal Kanton Réiden zu Osper säin 2. Repair Café vum Joer organiséiert. D’Asbl Gudd Noperen huet kräfteg mat ugepaakt, an nieft enger top Stëmmung fir de Verkaf vu Gedrénks a vill verschiddene Kuche gesuergt.

Déi éierenamtlech Repairer waren dauernd am Asaz an hunn hier Bescht gi fir futtis Fönen, Fonduesdëppen, ferngesteiert E-Autoen, Kassetteplayer, Computer, Lautsprecher, Boxen, Strëmp, Vëloen a stomp Messeren ze flécken.

Mir soen der Ekipp vun der Réidener Gemeng Merci fir déi exzellent Virbereedung vum Osper Sall, der Asbl Gudd Nopere fir hiren immensen Asaz a flott Zesummenaarbecht an natierlech alle Repairer fir hier Zäit an Energie an och sämtleche Visiteure fir hiert Vertrauen!

Den nächste Repair Café fënnt Samschdes, de 13. Juni zu Viichten am Festsall statt. Ugebueden Atelieren: Elektrogeräter, Mechanik, Vëlo, Bitzen, Computer, Schläife vu Messeren.

Kommt laanscht – et ass gratis!

Teilen auf