Pollo Bodem – 50 Joer politescht Engagement

Den 31. Januar ass de Pollo fir seng 50 Joer politescht Engagement geéiert ginn. Hien ass domat den amtéierende Politiker aus dem Kanton Réiden mat der längster politescher Carrière. 

Pollo, wat huet Dech viru 50 Joer dozou motivéiert, politesch aktiv ze ginn?

Schonn a menger Studentenzäit hunn ech mech fir d‘Politik interesséiert, besonnesch fir d’Lokalpolitik. Ech wollt mat upaken, de Leit bei hiren Doleancen hëllefen, matgestalten, Entscheedungen treffen a konkret Resultater virweise kënnen. Der Allgemengheet ze dingen ass fir mech eng nobel Aufgab!

Kanns Du eis kuerz Deng politesch Carrière beschreiwen?

Den 12. Oktober 1975 gouf ech an der deemoleger Sektioun Iewerleng an de Gemengerot gewielt a war direkt 1. Schäffen – e Mandat, dat ech 18 Joer laang ausgeüübt hunn. Duerno war ech sechs Joer Conseiller, an zënter dem 1. Januar 2000 Buergermeeschter vun der Gemeng Useldeng, also elo ewell 26 Joer! 

Ech si genau sou laang 1. Vizepresident vum Waassersyndikat DEA, si Member vum Bureau SEBES a vum Réidener Kanton a weiderhin aktiv a ville Veräiner. 

Wat mécht fir Dech de Reiz vun der Gemengepolitik aus?

D’Gemengepolitik erfuerdert Ausdauer, Fachwëssen, Feingefill a vill Mënschekenntnisser. Den Job ass ni langweileg a fuerdert een ëmmer erëm nei eraus. Genee dat huet mech all déi Jore motivéiert. 2023 nach eng Kéier als Éischte gewielt ze ginn, war fir mech eng immens Satisfaktioun.

Wat huet sech an de leschte 50 Joer verännert?

Alles ass vill méi komplex ginn, virun allem d’Prozeduren. D’Mentalitéit vun de Leit huet sech och duerch de gesellschaftliche Wandel staark verännert. Et ass wichteg, permanent bereet ze sinn, sech un nei Gegebenheeten unzepassen.

Wéi vill Zäit investéiers Du an d’Politik?

Inklusiv Syndikater kommen ech op dräi voll Aarbechtsdeeg pro Woch. Modern Technologien erlaben, dass een Deel vun der Aarbicht doheem kann absolvéiert ginn, mee d’Zuel vun de Reuniounen ass däitlech geklomm.

Wéi eng Projete leien Dir besonnesch um Häerz?

Besonnesch wichteg ware fir mech de Bau vun eiser Zentralschoul mat Maison relais a Sportshal, d’Renovatioun vun der Buerg mam Kulturwee an, um Kantonsniveau, d’Entwécklung vum Tourismus mat der TouristInfo an dem klengen Hotel „Péitche Lauer“ mat senge Mushrooms zu Useldeng.

Goufen et och schwiereg Momenter? 

Schwiereg Momenter kommen ëmmer nees onerwaart, a musse gemeeschtert ginn - dofir gëtt een och gewielt. Frustréierend ass, wann agereechten Dossiere bei den Administratiounen éiweg laang schleefen. Demotivéiert huet mech dat allerdings ni; ech hunn einfach geléiert domat ëmzegoen.

Wat ass Däi Rot un déi nächst Generatioun vu Gemengepolitiker?

Sech net liichtfankeg an d’Politik ze mellen, sech der grousser Verantwortung bewosst ze sinn an net ze séier opzeginn. Och d’Ënnerstëtzung vun der Famill ass wichteg, soss geet et nit!

Wéi laang wëlls Du nach politesch aktiv bleiwen?

Ech hoffen, datt d’Gesondheet matspillt an ech dëst Mandat als Buergermeeschter bis bei déi nächst Walen ausféiere kann. Duerno kann et Schluss sinn.