Triwwel-Kniwwel-Mätsch-Aktivitéiten

Mat eise „Kniwwel-Triwwel- Mätsch-Aktivitéiten“luede mir eis Butzen an, hir Ëmgéigend mat all hire Sënner ze entdecken. Dës Aktivitéiten hunn net nëmme grousst Spaasspontential, mee d’Butze kënne ganz niewebäi naturwëssenschaftlech Phänomener an d’Technik erfuerschen. An dësen Aktivitéite kënne si ausprobéieren, beobachten an experimentéieren an „d‘Léieren“ gëtt zu enger richteger Aventure.

Materialie wéi Waasser, Sand, Buedem, Plastilinn, Raséierschaum, Pabeierschnippselen, Räis oder Käschten komme bei de Butze besonnesch gutt un. Heimat léisst sech esou richteg gutt triwwelen, schëdden, tässelen, knätschen a mätschen. Duerch d’Hantéieren mat  Moossbecheren, Triichteren, Dëppercher, Läffelen an Zaangen oder a geleeten Aktivitéiten, wéi d’Fierwe vun Ouschtereeër mat Natron, Liewensmëttelfaarf an Esseg, erliewen d’Butze physikalesch a chemesch Phänomener hautno a kréien  éischt Erkenntnisser iwwert „Ursaach an Wierkung“.

Dës Aktivitéiten fërderen net nëmmen d‘kognitiv Entwécklung vun de Butzen, mee och hir Feinmotorik, d’Aan-Hand-Koordinatioun, d’Kreativitéit an d’Zesummespill. D’Butze léieren eegen Ideen auszeprobéieren, Beobachtungen ze deelen an zesumme Léisungen ze fannen.

D’Educatricë begleeden d’Butzen dobäi, si beobachten se, ginn Impulser oder stelle Froen. Esou entsti fantastesch Momenter vu Staunen, Begeeschterung, Fuerschungsdrang a virun allem vu risegrousser Freed a Spaass.