D’Gemeng Biekerech ënnert de Gewënner vum Solarpräis 2025

Den 16. Oktober huet am "Encore" an der Stad Lëtzebuerg d’Zeremonie vum Solarpräis Lëtzebuerg 2025, organiséiert vun Eurosolar Lëtzebuerg Asbl, stattfonnt. Dëse Präis, deen zënter 2003 verdeelt gëtt, soll beispillhaft Projete ervirhiewen, déi d’Energietransitioun zu Lëtzebuerg fërderen an de konkrete Potenzial vun den erneierbaren Energien an allen Deeler vun der Gesellschaft weisen.

Bei dëser Editioun goufen eng Rei bemierkenswäert Initiativen ausgezeechent: Biergerprojeten, ëffentlech a privat Gebaier mat héijer Energieeffizienz, mee och pädagogesch an nohalteg Aktiounen, déi zu engem bewossteren Ëmgang mat Energie motivéieren. De Solarpräis ënnersträicht virun allem den Innovatiounsgeescht, d’Zesummenaarbecht an de Courage, nei Weeër ze goen an nohalteg Léisungen ze testen – fir eng propper an onofhängeg Zukunft.

Ënnert de Präisdréier befënnt sech och d’Gemeng Biekerech, déi fir d’Grënnung vun hirer Energiegemeinschaft Biekerech ausgezeechent gouf – zesumme mam Energiepark Réiden, Oekostroum Biekerech an dem LIST. Dëse partizipative Projet erméiglecht et, Solarenergie lokal ze produzéieren a matenee ze deelen.