Visite vum neie Bierger*Haus zu Stengefort

Am Kader vun der Vision territoriale huet den 18. September eng Delegatioun vu Politiker, Mataarbechter aus eise Gemengen, dem Landesplanungsministère an dem Syndikat Kanton Réiden dat neit Bierger*Haus zu Stengefort besicht.

Empfaange goufe mir vun der 1. Schäffin Marianne Dublin-Felten, der Presidentin vun der asbl Bierger*Haus Catia Fernandes an der Responsabler vum Service du Vivre Ensemble et de l’égalité des chances, Jil Thurmes. 

D’Bierger*Haus versteet sech als Treffpunkt vu Bierger fir Bierger: eng inklusiv Plaz fir Austausch a Begéinung, ergänzend zu de besteeënde Strukturen. 

Déi éischt Aktivitéite si schonn un d’Rulle komm, dorënner den Elteren- a Grousselterentreff, e Bichertreff, d’Initiatioun à l’Aquarelle, den Oppenen Nomëtte souwéi e Seniorentreff. 

Am Moment ginn am Duerchschnëtt 5–6 Aktivitéite pro Mount organiséiert. 

Dës Aktivitéite ginn all am Agenda-Heft vun der Gemeng Stengefort publizéiert, dat eemol am Mount erauskënnt.  

D’Bierger*Haus gëtt vun enger Asbl geréiert, déi de Programm opstellt an d’Aktivitéite begleet. Et besteet eng Konventioun tëscht der Asbl an der Gemeng.  

Mir soen der Gemeng Stengefort a virun allem der Madam Dublin-Felten, der Madam Fernandes an der Madam Thurmes e grousse Merci fir hir Zäit an d’Deele vun all hiren Erfarungen. 

Dës wäerten eis ganz nëtzlech a wäertvoll si bei der Ausschaffung vun eisem Konzept fir e méiglechen Tiers-Lieux an eisem Kanton.