D’Rentrée am ALR

De 16. a 17. September war Rentrée am Atert-Lycée. 

Dënschdes sinn déi 241 Schüler vu 7e fir hiren éischte Schouldag an den ALR komm. Deen Dag ware si aleng am grousse Lycée, hunn hir Klassekomeroden an hir Enseignante kennegeléiert a krute vu Schüler vun 2e, déi Nomëttes fräiwëlleg an den ALR komm sinn, d’Gebai an d’Alentoure gewisen.  

Mëttwochs war dann och Rentrée fir all déi aner Schüler, dat sinn der dëst Joer am ganzen 1415, dovunner 24 Studenten, déi fir de BTS Ressources humaines ageschriwwe sinn.  

Am Enseignement secondaire classique sinn 620 Schülerinnen a Schüler ageschriwwen an am Enseignement Secondaire générale sinn et der 771. Dovunner sinn 131 op enger Terminale a wäerten dëst Joer alles gi fir den 3. Juli op der Diplomfeier op der Bün kënnen ze stoen.  

Um pädagogesche Konzept vum ALR gouf et eng kleng Ännerung

De Wocheplang gouf ersat duerch den Übungsplang. Ee flexibelen Übungsplang setzt op geziilt an intelligent Antrainéiere vu schouleschen Inhalter, ouni am rigide Woche-Rhythmus mussen ze funktionéieren, mee mat enger klorer Ausriichtung op déi nächst Evaluatiounsmomenter vum Schüler. Den Übungsplang gëtt fir all d’Klasse vu 7e bis 4e agesat.