Ouverture vun der Spillplaz a vum Beach-Volleyballsterrain zu Gréiwels

Samschdes, den 13. September 2025, war zu Gréiwels beim Fussballsterrain grouss Stëmmung: d’Gemeng Groussbus-Wal hat zesumme mat der Gréiwelser Pompjeeën A.s.b.l. op d’Ouverture vun der neier Spillplaz an dem Beach-Volleyballsterrain agelueden.

D’Spillplaz, ganz am Thema vun de Pompjeeën, gouf komplett a mat vill Häerzblutt vun der Gréiwelser Pompjeeën A.s.b.l. geplangt a finanzéiert. 

Mat originelle Spillelementer an engem kannerfrëndleche Konzept suergt si fir Begeeschterung bei Kleng a Grouss. 

Dëst ass eng flott Beräicherung fir d'Kanner a fir d'Duerfliewen, dofir seet d'Gemeng e grousse Merci!  

Och den neie Beach-Volleyballsterrain, entstan duerch ee LEADER-Projet „Ideenwerkstatt Groussbus-Wal“ ass eng Beräicherung fir dee ganze Site; en éischte Match huet fir sportlech Dynamik gesuergt an den neie Sandterrain konnt direkt esou richteg a Betrib geholl ginn. 

Nieft der neier Spillplaz an dem Beach-Volleyballsterrain ëmfaasst de Site déi 2 Foussballsterrainen, eng Boulepist an eng Grillplaz. Domat ass de Site scho gutt equipéiert, an enger weiderer Entwécklung steet näischt am Wee. 

No der offizieller Aweiung stoung en Apero a Gegrills um Programm, zerwéiert vum Club Nei Brasilien an der Jeunesse Groussbus. 

Mir soe jidderengem Merci deen zu dëser gelongener Ouverture bäigedroen huet!