Weekend vum Wëlle Westen 2025

Den 29ten Juni war et erëm esou wäit! De Service Tourisme & Vivre Ensemble vum Kanton Réiden hunn op hiert touristescht Fest fir Grouss a Kleng invitéiert. Dëst Joer huet de Weekend vum Wëlle Westen op der Biekerecher Kulturmillen stattfonnt.

Begleet vun der Musiksschoul Kanton Réiden, ënnert der Moderatioun vum Christian Schmit, a mat Ënnerstëtzung vun der Kulturmillen gouf de Weekend vu sëllege Politiker*innen an Éieregäscht ageleet.

Fir Animatioun, Iessen & Gedrénks a Spill & Spaass war iwwert de ganze Sonndeg gesuergt.  D’Visiteuren haten d’Méiglechkeet fir d’Stänn aus der Regioun ze bewonneren a bei gratis Aktivitéite matzemaachen. Vun Intefëschen, Facepainting, Karussell, Potty Lotty, Kraider erëmfanne bis hin zum Schiferatelier oder Sprangseeler selwer dréinen; eng gutt Zäit fir déi ganz Famill war garantéiert!

Niewebäi war natierlech och fir musekalesch Begleedung gesuergt mat Hëllef vun Djembé, Gans’ Anders an Hunneg-Strëpp.

De Service Tourisme & Vivre Ensemble vum Kanton Réiden seet all den touristesche Partner a Veräiner e grousse Merci, déi zum Succès vun dësem Event bäigedroen hunn! Vu datt de Weekend vum Wëlle Westen all Joer op engem aneren touristesche Site stattfënnt, rode mir Iech un: stay tuned!