Wandpark Kanton Réiden - De Chantier vun de 5 Wandrieder geet endlech lass!

„Alles kënnt zu senger Zäit“ – kaum e Spréchwuert passt besser op de Projet vum Wandpark Kanton Réiden. No jorelaangem Waarden a sëllege Gedoldsprouwen ass et elo esou wäit: Déi 5 Wandrieder kënnen endlech opgeriicht ginn!

E puer wichteg Informatiounen iwwert eise Wandpark:

Wien ass den Initiator vun dësem Projet?

D’SOLER (Société Luxembourgeoise des Energies Renouvelables) an de Syndicat Kanton Réiden sinn d’Promoteure vum Wandpark. D’Ekipp vu SOLER huet vun Ufank un d’Dossiere virbereet, d’Koordinatioun vun den Etüden souwéi d’Demande fir d’Geneemegungen iwwerholl. D‘SOLER ass och responsabel fir de Chantier an duerno fir d‘Exploitatioun.

Wou kommen d’Wandrieder stoen?

Dräi Wandrieder kommen an d’Gemeng Rammerech, eent an d’Gemeng Ell an eent an d’Gemeng Réiden.

Wéi grouss sinn d‘Wandrieder?

Déi véier Wandrieder vum Typ Enercon E138 hunn hier Gondel op 160m Héicht an d’Flilleke si jeeweils 69 m laang. Hier Leeschtung ass 4,26 MW.
D’Wandrad bei Foulscht ass vum Typ Enercon E115, mat enger Gondelhéicht vun 149 m, enger Flillekelängt vun 57,5 m an der selwechter Leeschtung vun 4,26 MW. 

Wéi ännert sech d’Produktioun vun der erneierbarer Energie mam Wandpark am Kanton Réiden?

Dës 5 Wandrieder vun der neister Generatioun hunn eng enorm Produktiounskapazitéit (zesummen ongeféier 50 GWh/Joer) a wäerten e ganz groussen Impakt op d’Energieautonomie vum Kanton Réiden hunn.

No der kompletter Inbetribnam, viraussiichtlech Enn 2026, wäert d’Produktioun vum Stroum aus erneierbaren Energien am Kanton, am Verglach zu 2024, verduebelt sinn. Wa mer d‘Produktioun vum neie Wandrad vu Biekerech bäirechnen, wäert de Kanton 110% vu sengem gesamte Stroumverbrauch (bezunn op 2024) decken. Iwwer d’Joer gekuckt, hätte mir dann zuguer een Iwwerschoss vun 10%. 

Wat sinn déi nächst Etappen?

• Juli 2025: Ufank vun den Infrastruktur- Aarbechten: Zoufaartsweeër, Montageplattformen, Fundamenter, Stroumnetz
• Fréijoer - Hierscht 2026: Montage vun den Tierm an de Flilleken
• Enn 2026: Inbetribnam vun de Wandrieder (no der Test- a Reglage-Phase)

Mat wéi engen Nuisancë mussen d’Awunner wärend dem Chantier rechnen?

Stéierungen am Verkéier si bei esou engem Chantier leider net ze vermeiden, besonnesch wéinst dem heefegen Transport u Material- a Maschinnen. Well déi 5 Sitten awer wäit ausernee leien, verdeelt sech dëse Verkéier. D‘SOLER wäert mat den Anrainer an de Baueren a stännegem Kontakt stoe fir d’Stéierungen sou wäit wéi méiglech ze begrenzen. Verschidde Momenter wäerte méi spannend si wéi anerer – d’Liwwerung vun de bal 70 Meter laange Flilleke wäert zum Beispill e spektakulären an ëffentlechen Event ginn.

Wat geschitt mam Stroum, deen d’Anlage produzéieren?

De Stroum gëtt lokal agespeist a lokal genotzt. Den Iwwerschoss gëtt an dat nationaalt Netz agespeist.

Contact : 

SOLER
info@soler.lu
T. 2631611