Éischter Bëschrou – Waldbaden mat alle Sënner

Den 30. Abrëll gouf bei summerlechen Temperaturen den neien Themewee ronderëm d’Waldbaden zu Éischt offiziell ageweit.  

D’Gemeng Rammerich huet zesumme mat hirem Fierschter a mam ORT Éislek dësen neien Trëppeltour ausgeschafft an ëmgesat. Hei geet net nëmmen ëm d‘Wanderen, mee virun allem dorëms, de Bësch mat alle Sënner ze erliewen: ze richen, ze kucken, ze lauschteren, ze spieren an esouguer ze schmaachen.

Um 4 km laange Rondgang erwaarden d’Wanderer verschidde flott Statiounen, wéi e Buerfousswee, en 3D-Bëschkino, Doftstatiounen, Hängematten a villes méi. 

De markéierte Wee ass net fir Kutschen oder Rollstull gëeegent, an erfuerdert trëttsécher Schong. Parking ass am Duerf Éischt bei der Kierch, de Startpunkt läit am Bësch laanscht d’Strooss Richtung Foulscht.