Porte ouverte am ALR : Samschdes, 26. Abrëll 2025

De 26. Abrëll 2025 organiséiert den ALR seng järlech Porte ouverte. Den Direkter vum ARL, de Jeff Kohnen, verréit eis e puer méi Detailer.  

Wat steet um Programm?

D’Portes ouvertes riichte sech un d’Schüler aus dem Cycle 4 an hir Elteren, fir de Lycée a säi pädagogescht Konzept virzestellen. All Stonn gëtt am Festsall dozou eng Präsentatioun ofgehalen (ofwiesselend op Lëtzebuergesch an op Franséisch). Parallel dozou fannen a klenge Gruppe Visitten duerch d’Gebai statt. Am Hall si Stänn vun de verschiddene Fächer, Servicer (SePAS, ESEB, Service éducatif, Internat) an der Direktioun, wou d’Schüler an d‘Elteren eis hir Froe stelle kënnen. Och d’Internat ka besicht ginn. Natierlech ass och fir dat leiflecht Wuel gesuergt. 

Wat wëllt Dir de potenzielle Schüler an Elteren op dësem Dag vermëttelen, dass si sech fir den ALR entscheeden?

An éischter Linn wëlle mir eist pädagogescht Konzept mat FOLA-Stonnen, Wocheplang, COACH-Stonnen an engem extensive Stonneplang virstellen. Donieft präsentéiere mir natierlech och eis grouss Parascolaire Offer mat de Mëttesaktivitéiten an den ALR-Talents. D’Schüler an d’Elteren interesséiere sech dann natierlech och fir eis breetgefächert Offre scolaire am Enseignement secondaire classique, am Enseignement secondaire générale an der Voie de préparation.  

Op de Visitten duerch de Lycée léiere Schüler an Elteren eis modern Infrastrukture kennen. All Grupp gëtt vun zwee Schüler an engem Enseignant begleet déi wärend der Visite déi néideg Informatioune liwweren. 

Wien hëlleft deen Dag mat?

Den Dag vun der Portes ouvertes sinn all d’Enseignanten an e Groussdeel vum Personal am Asaz. Si assuréieren d’Präsenz op de ville Stänn am Hall vum Lycée a sinn do fir den Elteren an de Schüler op hir Froen ze äntweren. Gläichzäiteg si vill vun eise Schüler deen Dag am Asaz, entweder als Guide op de Visitten oder op spezifesche Stänn an de Sciences naturelles wou si kleng Experimenter präsentéieren. D’Stänn mam Iessen a Gedrénks gi vum Personal, de Schüler an de Membere vum Elterecomité assuréiert.

Kommt laanscht! 

Den 26. Abrëll ass vun 9 bis 13 Auer vill lass am ALR – e Besuch lount sech! Méi Infoen op www.alr.lu