Trëppeltier fir Familljen am Kanton Réiden: Safari am Wëlle Westen

Hutt Dir schonn eng Safari am Wëlle Westen entdeckt? Dobäi handelt et sech ëm kannerfrëndlech, kuerz Trëppeltier verbonne mat engem Déiere-Quiz. Op all Tour sinn nämlech 4 Plaquette verstoppt mat engem Hiweis op dat gesichten Déier. Et heescht also d’A grouss opmaachen an op der Lauer sinn!  

Wann d’Ouschtervakanz ufänkt, wäerten all eis Safarie kontrolléiert gi sinn – da kënnt Dir zesumme mat Äre Kanner eng léierräich a spannend Aktivitéit am Fräien erliewen. 

D’Bichelche mat den 20 Safarie kritt Dir gratis an der TouristInfo Wëlle Westen zu Useldeng. 

All weider Informatiounen an Norichte fannt Dir och online ënnert: https://kanton-reiden.lu/safari

D’Sport- a Jugendkommissioun vun der Gemeng Groussbus-Wal organiséiert dëst Joer gemeinsam Wanderungen – ënner anerem op all de verschiddene Safari-Trëppeltier an hirer Gemeng.

Déi éischt gemeinsam Safari-Wanderung huet de 16. Mäerz zu Kéiber stattfonnt a war gutt besicht. Bei schéinem Fréijoerswieder hu Grouss a Kleng vill Freed dru gehat, all d’Plaquetten op der Streck ze sichen.

Déi nächst gemeinsam Safari-Wanderungen fanne statt:  

• den 18. Mee um 9h30 zu Wal
• den 13.07 um 9h30 zu Randschelt
• den 21.9 um 9h30 zu Dellen

Fir méi Info, mellt Iech ënner der Nummer 20358-202 oder per Mail jennifer.bodevin@g-w.lu