Ouschteren am Préizerdaul 2025

Ouschteren am Préizerdaul ass säit laangem DAT Event um Ouschterweekend. Dëst Fest gëtt vum lokale Syndicat d’Initiative an der Gemeng Préizerdaul organiséiert. Si hunn eis op e puer Froe geäntwert.  

Wéi laang gëtt et dëst Fest schonn?

D’Ouschterfest am Préizerdaul geet op d’Joer 1841 zréck, d’Traditioun gëtt et also schonn 184 Joer!  

Wat ass den Ursprong vun dësem Fest?  

Ufanks war et e Maart mat Véi a landwirtschaftliche Produkter. Wärend den 1960er an Ugangs 1970er war et eng Ausstellung mat landwirtschaftliche Maschinnen. Duerno ass sech mat méi allgemengen Theme befaasst ginn, awer ëmmer nach dacks mat landwirtchaftlichem Hannergrond.  

Wat sinn d’Highlights dëst Joer?

• Op Karfreide verkeeft d’Amicale vun de Pompjeeën, wéi gewinnt, hire gebakene Fësch.  
• Samschdes owes ass am gehëtzte Festzelt e Bal vun eisem Club des Jeunes.  
• Ouschtersonndes tëscht 14h00 an 18h00 an Ouschterméindes kënnt Dir eis Konschtausstellung kucke kommen mat ville Kënschtler, dovunner 3 aus dem Préizerdaul. A Sonndesnomëttes kënnt Dir nom Mëttegiesse bei eis op den Thé Dansant danze kommen.  
• Ouschterméinden ass dann de groussen Ouschtermaart mat 42 Stänn, virun allem Hobbykënschtler, eng Rei Kiermesbuden, Laserschéissen a Concerten ab 11h30 am gehëtzte Festzelt.

Wéi vill Leit schaffe bei der Organisatioun mat?  

Bei der Entente Ouschteren schaffen eng Ronn 20 Leit mat an op der Gemeng si mir zu 3 vun der Verwaltung plus eis Arbichter, also insgesamt eng 30 Persounen.  

Fannen d’Kanner och eppes am Programm?

Jo, d’Kanner kommen och op hir Käschten. Dëst Joer gëtt et Intefëschen, een Trampolin an e Sprangschlass. Ab 6 Joer kann een an der Sportshal Laser-Schéissen. Fir déi bëssi méi Grouss hu mir eng Schéissbud a Knuppautoen.  

Wou fannen ech de ganze Programm?  

Dir fannt all Informatiounen op der Facebook-Säit vun eisem Fest: Ouschteren am Préizerdaul.

Mir freeën eis op Äre Besuch!