Nächste RDV vum Repair Café Kanton Réiden: 29. Mäerz zu Useldeng

Eise nächste RDV vum Repair Café Kanton Réiden ass Samschdes, den 29. Mäerz vun 14h00 bis 17h00 am Centre Culturel zu Useldeng. Déi ugebueden Ateliere sinn: Elektrogeräter, Elektronik, Vëlo, Bitzen a Schläifen. Et leeft ëmmer ouni Umeldung, jiddereen ass wëllkomm a wann Dir zefridde sidd, kënnt Dir eppes an d'Tip-Box leeën. Mir freeën eis op Äre Besuch.

Mir stellen Iech awer och nach gären  eise Spezialist fir d’Reparatur vu Vëloe vir: de Bernhard Kern vu Näerden. De Bernhard, deen och e Samschden den 29. März wäert derbäi sinn, ass e pensionéierte Maschinnebauingenieur, dee seng lescht berufflech Joren als Seniormanager am Beräich vun de Kontrollsystemer fir Autos-Emissioune verbruecht huet. De Bernhard fiert selwer ganz gär Vëlo a kennt sech exzellent mat der Technik vun de Vëloen aus, déi hee gäre mat jidderengem deelt. 

Bernhard, säit wéini bass Du als Repairer am Repair Grupp vum Kanton Réiden aktiv ?

Ech si vun Ufank u mat dobäi, also scho vun der éischter Infoversammlung. Säitdeem hunn ech kee Repair Café am Kanton verpasst.

Wéi ass et dozou komm, dass Du Vëloe flécks ?

Ech flécke Vëloe scho säit menger Kandheet. Déi éischte Kéier gouf mir gewisen, wéi een e Schlauch demontéiert a fléckt – an zënterhier huet mech dat net méi lassgelooss.

Wat sinn d’Problemer, déi’s Du am Repair Café flécks ?

Typesch Problemer si verstellte Bremsen, déi schläifen, Schaltungen déi sprangen, dréche Schmierplazen, platt Pneuen an Aachtercher.

Wat mécht Dir am meeschte Freed un der Aarbecht am Repair Café?

Ech fannen et flott, d’Freed an de Gesiichter vun de Clienten, besonnesch bei de Kanner, ze gesinn, wann hire Vëlo no der Reparatur nees perfekt fiert.

Ginn et Tipps, déi‘s Du de Vëlosbesëtzer gäre mat op de Wee gëss fir heefeg Reparaturen ze vermeiden?

Jo! Vergiesst net, reegelméisseg Loft an d’Pneuen ze pompelen an d’Schaltung an d’Kette gutt ze uelegen – dat ka vill Problemer verhënneren.

Mir soen dem Bernhard villmools Merci fir säin Asaz! 

Zéckt net, mat Ärem Vëlo an den nächste Repair Café ze kommen – Samschdes, den 29. Mäerz zu Useldeng am Centre Culturel a maacht Äre Vëlo fit fir déi nei Saison! Mir freeën eis op Äre Besuch (gratis)! 

Kontakt: Caroline Schmit
Syndikat Kanton Réiden 
Service Projets
caroline.schmit@kanton-reiden.lu

Tel. 28334-040