Kanton Réiden: méi wéi 30 Joer Innovatioun a Kooperatioun

Historique

Gegrënnt 1990 duerch e groussherzoglecht Reglement, ass de Syndicat Intercommunal De Réidener Kanton d'Resultat vun der Zesummenaarbecht tëscht de Gemenge Bettborn (haut Préizerdaul), Ell, Rammerech, Réiden a Saeul. Dëse Projet ass an enger schwiereger Zäit fir de Kanton Réiden entstanen, dee vun engem staarke Bevëlkerungsréckgang vu bal 28 % tëscht 1900 an 1980 betraff war, wärend d’Gesamtbevëlkerung vu Lëtzebuerg ëm méi wéi 50 % gewuess ass. Dësen Ofbau war op verschidde Facteuren zréckzeféieren: d’Verleeung vu verschiddenen ëffentlechen Administratiounen, d'Ofschafung vun Eisebunnslinnen am Kanton an d'stänneg Ofhuele vu landwirtschaftleche Betriber.

Am Kader vun dëser Erausfuerderung hunn sech d'Gemengen zesummegedoe fir d’Regioun ze revitaliséieren, d'lokal Ekonomie z'ënnerstëtzen an d'Wunnqualitéit ze verbesseren. Iwwer d'Joren hu weider Gemengen sech dem Syndikat ugeschloss: Biekerech 1991, Groussbus a Viichten 1995, Wal 1998 an Useldeng 2000, déi lescht Gemeng vum Kanton, déi de Syndikat komplett gemaach huet.

Zënter senger Grënnung huet de Syndicat Intercommunal De Réidener Kanton e bemierkenswäerte Bevëlkerungszouwuess vun 80 % erlieft, wat däitlech iwwer dem nationalen Duerchschnëtt vu 65 % läit. Dëse Succès ass op eng Rei ambitiéis Projeten zréckzeféieren, déi wirtschaftlech, sozial an ekologesch Entwécklungen integréieren.

Fir seng 30 Joer am Joer 2020 ze feieren, huet de Syndikat sech moderniséiert mat engem neie Logo an enger neier Identitéit, an heescht elo einfach Kanton Réiden. Am Joer 2024 féiert de Syndikat dës Dynamik weider mat enger erneierter Kommunikatiounsstrategie, déi d’Aféierung vun engerZäitschrëft, enger Newsletter an enger neier Websäit beinhalt, déi Ufanks 2025 online soll goen.
 

Wichteg Datumer vum Kanton Réiden 

• 1991 : Kaf vun der Zone Riesenhaff 
• 1996 : Bau vum CIPA zu Réiden 
• 1997 : Grënnung vum Energieatelier (Komm Spuer Mat) 
• 1998 : Kaf vun der Zone Solupla 
• 2000 : Éischt Erweiderung vun der Zone Solupla 
• 2001 : Grënnung vun der Crèche A Butzen zu Räichel 
• 2008 : Start vum Sport Krees Atert 
• 2010 : Grënnung vum kantonale Office Social (Oscare)
• 2012 : Start vum Projet Youth 4 Work an Aféierung vum Bummelbus
• 2013 : Start vum Klima-Pakt a vum Beki 
• 2014 : Erweiderung vun der Zone Solupla a Leedung vum GAL LEADER Atert-Wark 
• 2016 : Grënnung vun der sozialer Immobilieagentur Haus-Care a Start vum Projet Wandpark Kanton Réiden 
• 2020 : Erweiderung vum CIPA Réiden an d'Moderniséierung vun der Zone Riesenhaff 
• 2021 : Start vum Pakt vum Zësummeliewen an drëtt Erweiderung vun der Solupla
• 2022 : Start vun vun der Vision territoriale fir de Kanton Réiden 
• 2023 : Integratioun vun den Aktivitéiten vun de Foyers de jour A Butzen Ell a Räichel 
• 2024 : Integratioun vun den Aktivitéiten vum Sportskrees Atert