D’Viichter a Mäerzeger Geschichtsfrënn feieren hier 25 Joer!

Wat war den Ausléiser fir d’Grënnung vun Ärem Veräin?

D’Iddi fir e Geschichtsveräi koum vun eisem nach ëmmer aktuelle President Romain Jacoby. Zënter senger Kandheet interesséiert sech de Romain nämlech fir d’Geschicht a war dacks „siche gaangen“ an huet dobäi Relikter aus der Steenzäit, vun de Réimer an aus dem 2. Weltkrich mat heem bruecht.
D’Entdeckung vum gallo-réimesche Mosaik 1995 huet d’Viichter Leit fir d’Geschicht vum Duerf sensibiliséiert an duerch dës Dynamik hu sech genuch Leit aus dem Duerf zesummefonnt fir bei de Viichter Geschichtsfrënn matzeschaffen. 2008 goufen och d’Mäerzeger mat integréiert a mir hunn eis a Viichter a Mäerzeger Geschichtsfrënn ëmbenannt.

Wat ass d’Missioun vun Ärem Veräin?

Eis Missioun ass, duerch Recherchen um Terrain – an de Familljen an an der Literatur – historesch Evenementer a Perséinlechkeeten ze erfaassen, ze dokumentéieren an ze publizéieren. Dobäi beschränke mir eis net nëmmen op Viichten a Mäerzeg, mee interesséieren eis och fir d’Geschicht vun den Nopeschgemengen. Am Mëttelpunkt steet net d’Sich no materielle Schätz, mee den Erhalt vum historesche Patrimoine vun eiser Géigend. Eis Aarbecht gliddert sech an dräi grouss Beräicher: Recherche, Publikatioun an d’Vermëttlung un de Public.

Wat sinn d’Aktivitéite vun de Viichter a Mäerzeger Geschichtsfrënn? 

• Archeologie: Sammele vu mëndlechen Iwwerliwwerungen, Prospektioun (mat Geneemegungen), Sammelen an Auswäerte vu Fondgéigestänn
• Architektur: Restauréiere vu Kräizer, Dokumentatioun vun alen Haiser, Asetze fir d’Erhalen an d’Klasséiere vu wäertvoller Bausubstanz 
• Archiven: Sammele vu Fotoen, Filmer, Postkaarten, Dokumenter, Zeitungsausschnëtter 
• Genealogie: Recherchéiere vun eise Virfaren, Kontakter mat Ahnenforscher 
• Weltkricher: Dokumentatioun vun Erliefnesser aus Krichszäiten, Sammele vun Dokumenter, Fotoen a Material
• Auswanderung: Dokumentatioun a Kontakter an Amerika
• Publikatiounen: Broschür De Viichter Geschichtsfrënd, Depliant vum Mosaik, personifizéiert Timberen, Postkaarten a Puzzelen
• Verschiddenes: Organisatioun vu Visitten, Ausstellungen a Journéeën, Zesummenaarbecht mam INRA (Institut National de Recherches Archéologiques), INPA (Institut National pour le Patrimoine Architectural) an dem Musée um Fëschmaart

Wat waren Är perséinlech Highlights vun de leschte 25 Joer?

Eng Haaptaktivitéit vun äis ass d’Publikatioun vun der Broschür De Viichter Geschichtsfrënd. Ausserdeem hate mir viru kuerzem schonn déi 11. Oplo vun der Journée de l’Histoire locale, wou sech ronn 30 historesch Veräiner, Muséeën, Sammler, Auteuren a Genealogie-Experten dem breede Publikum presentéiert hunn.

Wourunner schafft Dir aktuell?

De Moment si mir bedeelegt un engem Projet, fir eng archeologesch Kaart, souwuel analog, wéi digital, opzebauen. Dann hu mir wëlles, al Fotoe vu Viichter a Méchelbucher Leit, Veräiner an Haiser ze scannen an ze beschrëften. A mir schaffen un der neier Editioun vum Viichter Geschichtsfrënd.

Wat fir Informatioune publizéiert Dir am „De Viichter Geschichtsfrënd“?

Duerch d’Hëllef vu kompetenten a benevole Mataarbechter decke mir eng breet Panoplie un Theemen of. Duerch d’Prospektioun vu verschiddene Memberen hu mir Artefakten aus der Steenzäit, aus der Réimerzäit an aus dem zweete Weltkrich, déi mir dann am Viichter Geschichtsfrënd auswäerten. Och Sammlungen, al Fotoen an eng Bibliographie vun eiser Gemeng ginn an der Broschür ofgedréckt. D’Broschür kann ee beim Veräi kréien.

Wat fir eng Bedeitung huet déi lokal Geschicht?

D’Geschicht stäerkt d’Zougehéieregkeetsgefill an de sozialen Zesummenhalt. Een Duerf ouni Geschicht verléiert säi Gesiicht a seng Séil. Dofir ass eis d’Deele vun eise Resultater mam Public esou wichteg.

Wat wënscht Dir Iech fir d’Zukunft vun Ärem Veräin?

Eist Zil ass et, déi historesch Ierfschaft lieweg ze halen an och jonk Generatioune fir d’Vergaangenheet vun eiser Regioun ze begeeschteren. E regionale Musée wier eng wichteg Perspektiv fir de Kanton.

Wéi kann een Är Aarbecht ënnerstëtzen?

Ënnerstëtzung ass méiglech duerch Memberschaft, Donen, de Besuch vun Aktivitéiten oder d’Bereetstelle vu Fotoen an Dokumenter. All Kaf vun eise Produiten (personaliséiert Timberen, Broschüren, ...) an all Informatiounen, déi mir kréien, hëllefen äis materiell an ideell weider.
Mir wëllen der Gemeng Viichten e ganz häerzleche Merci ausdrécke fir hir wäertvoll a kontinuéierlech Ënnerstëtzung vun Ufank un.
 

Kontakt

Viichter & Mäerzeger Geschichtsfrënn
info@viichtengf.lu

https://viichtengf.lu/