Natur & Ëmwelt Sektioun Kanton Réiden

Zanter iwwer 40 Joer engagéiert sech d’Lokalsektioun Kanton Réiden fir den Naturschutz an der Regioun. Wat 1985 als Sektioun vun der deemoleger Natur- a Vulleschutzliga gegrënnt gouf, ass haut Deel vun der Organisatioun Natur & Ëmwelt – der gréisster Ëmwelt- an Naturschutzorganisatioun vu Lëtzebuerg. Eng engagéiert Ekipp vu Benevollen aus eisem Kanton setzt sech mat vill Passioun fir d’Erhale vun eiser Natur an.

Wat ass d’Missioun vun Ärer Lokalsektioun?

Am Mëttelpunkt steet d’Beobachtung vun der Vullemigratioun op der „Sëller Héicht“. Vun August bis Mëtt November verfollegt eng spezialiséiert Ornithologegrupp de Vullenzuch – mat Resultater, déi och international unerkannt a genotzt ginn.
Genau sou wichteg ass eis praktesch Aarbecht um Terrain: Zanter 1985 hu mir ronn 45.000 Heckeplanzen an 2.500 Beem verdeelt. Donieft engagéiere mir eis fir méi Nohaltegkeet am Alldag, zum Beispill duerch d’Promotioun vu Recyclingpabeier an de Schoulen a Verwaltungen.

Wéi eng Aktiounen hutt Dir an de leschte Joren ëmgesat?

Nieft eise järleche Bam- an Heckeplanzaktioune gehéieren och d’Nistkëschtenaktiounen an d’Ophänke vu speziellen Nistäscht fir d’Waassermärel laanscht eise Baachen zu eisen Aktivitéiten.

Zousätzlech bedeelege mir eis um neie Brutvullenatlas fir Lëtzebuerg an informéieren d’Bevëlkerung reegelméisseg iwwer eist Uleies an de Gemengebueten.

Wéi eng Natur-Problemer gesitt Dir besonnesch bei eis?

Och bei eis ass de Réckgang vun der Biodiversitéit däitlech ze spieren, vill Aarte fannen ëmmer manner Liewensraim. Suerge mécht eis och d’Stierwe vun de Fichtebëscher, dacks ouni genuch nohalteg Wiederaufforstung.

Dobäi kënnt eng weider, oft ënnerschate Problematik: d’Liichtverschmotzung. Ze vill kënschtlech Beliichtung féiert zu engem staarke Réckgang vun den Insekten – an doduerch fannen d’Villen manner Narung an si huelen of.

Wou leien d’Chancen, fir d’Aartevillfalt am Kanton Réiden ze stäerken?

Grouss Chancë leien an der Renaturéierung. D’Stëftung „Hëllef fir d’Natur“ besëtzt am Kanton iwwer 100 Hektar schützenswäert Flächen, déi geziilt opgewäert ginn. Sou entstinn nei Liewensraim, an d’Biodiversitéit kritt eng reell Chance, sech ze erhuelen.
Och eis Lokalsektioun dréit dozou bäi – duerch Berodung an Ënnerstëtzung beim Kaf vu Flächen.

Wéi ka jiddereen am Alldag maachen?

Jidderee kann e wichtege Bäitrag leeschten: 

• D‘Bierger kënnen an hirem Gaart eenheemesch Wëllsträicher a Blummen uplanzen, fir de wëlle Beie genuch Narung ze bidden, well si op natierlech Blummen ugewise sinn. Héichgeziichte Stauden hunn nämlech net vill Nektar oder Pollen.
• D’Gemenge spillen eng wichteg Roll, andeems si Gréngfläche mat eenheemesche Wëllsträicher a Blummen uleeën an d’Liichtverschmotzung reduzéieren, fir d’Insekten ze schützen.
• D‘Landwirtschaft ka Fruchtfollegen amplaz vu Monokulturen ubauen, manner Pestiziden notzen, Bléisträifen um Feldrand uleeën, Hecken a Beem uplanzen an d’Bongerten erhalen.

Wéi kann een Iech ënnerstëtzen?

Mat enger Memberschaft kann all eenzelen dozou bäidroen, eis Stëmm ze stäerken – net nëmmen am Kanton, mee och landeswäit.
Gläichzäiteg ass et wichteg, datt e Veräin sech ëmmer nees erneiert. Dofir si mir op der Sich no motivéierte jonke Leit, déi Loscht hunn, nei Iddien anzebréngen an dës och konkret ëmzesetzen. Mellt Iech gäre bei eis!

Kontakt: 

Natur&Ëmwelt Sektioun Kanton Réiden 
Romain Kleer
Tel: 621 75 85 81
Mail: rkleer@pt.lu