Fir proppert Waasser - kommt kucken!

Visitt vun der Quell Kaschbur de Samschden den 18. Abrëll 2026

Eis Quellfaassungen ënnerleie strenge Qualitéitsnormen, déi mat der Zäit och ëmmer weider evoluéieren. Sou wonnert et net, datt dës Quell aus dem Joer 1926 an de leschten honnert Joer 3 mol renovéiert gouf. D’Haaptsanéierung huet tëscht 2023 an 2025 stattfonnt an dës Kéier gouf och dru geduecht, fir d’Quell esou ze amenagéieren, datt se fir Visitte vun der Ëffentlechkeet ka genotzt ginn. Am Géigesaz zu villen anere Quellfaassunge kann een am Kaschbur ganz gutt gesinn, wéi d’Waasser direkt aus dem Fiels erauskënnt an opgefaange gëtt.

De Kaschbur ass d’Haaptquell vum Drénkwaassersyndikat DEA. Si huet zu all Joreszäit een impressionnanten Debit. Dir kënnt Iech dovun den 18. Abrëll iwwerzeegen, wann den Drénkwaasserschutz-Animateur vun der DEA d’Gebai fir 3 Stonnen opmécht an Iech Erklärungen zur Waasserqualitéit an zur Drénkwaasserversuergung an der Regioun gëtt.

Op der Plaz kënnt Dir och bei enger Waasserverkäschtegung matmaachen, wou et gëllt, verschidde Mineralwaasser am Goût ze erkennen. 

Organiséiert vum Drénkwaasserschutz Région Attert & Wincrange, Maison de l’Eau de l’Attert asbl, DEA

Treffpunkt

Beim Bësch vun Iener (Gemeng Sëll)

Visitten

45min

3 Departen : 13h30 / 14h30 / 15h30

Info iwwer den Treffpunkt & Umeldung (bis 16.04) : 

D’Fësch am Fokus - erlieft d’Fësch hautno den 25. Abrëll 2026

Fir d’Waasserqualitéit an der Atert ze iwwerwaachen, gi vun der Waasserverwaltung reegelméisseg eng Rei Analyse gemaach. Do ginn nieft cheemeschen a physikalesche Parameter och d’Waasserorganisme betruecht an all 3 Joer gëtt eng elektresch Fëscherei duerchgefouert, well och d’Zesummesetzung vun der Fëschpopulatioun e Réckschloss op proppert Waasser gëtt. Et ginn 3 Moossstatiounen op der Atert, wou dës Analyse gemaach ginn: Réiden, Béiwen a Colmer-Bierg. 

De 25. Abrëll weise mir Iech zu Colmer, wéi esou eng Befëschung gemaach gëtt.  Vun 14 bis 16 Auer si mir op der Plaz. Fir d’éischt kënnt Dir gesinn, wéi d’Fësch gefaang ginn, da wéi se gesënnert a bestëmmt ginn. Dir kritt och d’Méiglechkeet e puer kleng Frellen, déi dëst Joer an der Pisciculture ze Lëntgen aus den Eeër geschlüpft sinn, an d’Atert auszesetzen. A wann der bei eisem Gewënnspill op der Plaz matmaacht, dann hutt dir d’Méiglechkeet eent vun de Bicher „Les poissons au Luxembourg“ ze gewannen. 

Dës Aktioun gëtt duerchgefouert an Zesummenarbecht mat den Ëmweltkommissioune vu Colmer-Bierg a Bissen

Treffpunkt

Colmer-Bierg am Park bei der Atert

Visitten

14h-16h

Umeldung

Umelle kënnt Dir Iech bis den 23. Abrëll op: maison.eau@attert.com

D'Plaze si begrenzt.

Wichteg

Dës Aktioun ass staark wiederofhängeg a muss bei Reen ofgesot oder verluecht ginn. Dofir biede mir Iech, Iech unzemellen, fir dat mir Iech wann néideg kontaktéiere kënnen.