D’Gemenge Biekerech an Ell si mam European Energy Gold Award ausgezeechent ginn

D’Gemenge Biekerech an Ell goufen de 7. November 2025, fir hir Efforten am Klimaschutz ausgezeechent.

Dank hirem laangjäregen a konsequenten Engagement am Kader vum Klimapakt 2.0 hunn déi zwou Gemenge beim leschten Audit am Summer 2025 allen zwou e Resultat vun 82 % erreecht.

Béid Gemengen hu vill Klimaschutz-Moossnamen an der Verwaltung ëmgesat, awer och an der Ënnerstëtzung vun hiren Awunner, besonnesch am Beräich vun den erneierbaren Energien, der Energieeffizienz duerch d’Sanéierung vu Gebaier, dem Waasserspueren, der Kreeslafwirtschaft souwéi bei Moossname fir sech un de Klimawandel unzepassen.

Dës laangjäreg Aarbecht gouf op internationalem Niveau bei der Präis-Iwwerreechung zu Saas-Fee an der Schwäiz belount.
Déi lëtzebuergesch Delegatioun war staark vertrueden, well insgesamt 15 Gemenge vun eisem Land d’Rees op sech geholl haten, fir dës wäertvoll Auszeechnung entgéintzehuelen.

Mir felicitéieren de Gemenge Biekerech an Ell fir hir virbildlech Aarbecht am Sënn vun enger liewenswäerter Welt fir déi zukünfteg Generatiounen!