D’Margot Coljon erënnert sech

D‘Margot Coljon war 50 Joer laang Wiertsfra zu Ell am Café des Sports, wou och vill Veräiner an- an ausgaange sinn. Mir kucke mat hir zréck op hiert laangt Liewen.

Wéini a wou sidd Dir gebuer?

Ech sinn den 2. September 1935 zu Ell gebuer. Mäi Gebuertsdag um Pabeier ass awer den 1. September, well et deemools falsch opgeschriwwe gouf an ni méi verbessert ginn ass. 

Erzielt eis e bëssi iwwer Är Kandheet 

Ech war Eenzelkand. Meng Mamm war vu Grendel, mäi Papp vun Ell. Heen hat seng Schräinerei bei eis am Haus an der Nojenerstrooss zu Ell. Ech war bis an d‘7. Schouljoer zu Ell; et gouf nëmmen ee Schoulmeeschter fir déi 8 Klassen. Duerno sinn ech op Atert (B) an d’Pensionat gaang, fir Franséisch ze léieren. 

Gëtt et eng Erënnerung aus Ärer Kandheet, déi Iech besonnesch hänke bliwwen ass?

Am Wanter si mir d’Nojenerstrooss mam Schlitt erofgejauft. Eng Kéier souze mir zu 4 drop, an op eemol sinn déi 2 viischt ofgesprongen. Du réischt hunn ech gesinn, dass dem Téid säi Mëllechcamion matzen um Wee stoung. Meng Frëndin an ech hunn eis séier gebéckt a si mam Schlitt ënnert dem Camion erduerch geflitzt. Dat war Chance!! Eng Fra, déi eis gesinn huet, war duerno 8 Deeg krank! 

Wat si schéi Momenter aus Ärer Jugendzäit?

Mat 17 Joer sinn ech op Bréissel an den Déngscht gaang an hu bei verschiddene Familljen de Stot gemaacht. Et huet mir gutt do gefall, déi Zäit goufen et vill Lëtzebuerger zu Bréissel a mir sinn donneschdes a sonndes ëmmer danze gaangen. D’Aarbecht gouf gutt bezuelt, besser wéi zu Lëtzebuerg, ech hunn 3000 Frang de Mount verdéngt. 

Wou hutt Dir Äre Mann kenne geléiert?

Mir hunn eis op engem Bal zu Bréissel kenne geléiert an hunn eis 1957 ouni vill Gedeessems do bestuet. Wéi mäi Mann, den Henri (Garlemant), 1958 eng Aarbecht bei der ARBED fonnt huet, si mir zréck op Ell bei meng Eltere geplënnert. Déi Joren duerno krut ech meng 2 Bouwen. 

Wéi ass et dozou komm, dass Dir viru 50 Joer de Café iwwerholl hutt ? 

Well mäi Papp a mäi Mann net gutt eens gi sinn, hu mir zougesot wéi de Café des Sports mam Wunnhaus uewendriwwer fräi gouf. Deemools hat dat Gebai nach der Mousel-Brauerei gehéiert. Mäi Mann ass weider op Déifferdeng schaffe gaangen an ech hunn 1975 de Café iwwerholl. 

Wat huet Iech um Beruff vum Wiert gefall? 

Ech hunn alt bei menge Grousselteren am Café zu Grendel ausgehollef, esou hunn ech kee Wierts-Exame méi bréichten ze maachen. Ech sinn e Mënsch, dee ganz gär ënner Leit ass. Meng Jongen hu vill mat mir gestridden, fir dass ech am Alter vun 90 Joer mam Café soll ophalen!

Wat war dee schéinste Moment bis elo an Ärem Liewen?

Wéi de Fussballveräin SC Ell 2012 an der Coupe de Luxembourg géint Rouspert gewonnen hat an iwwer 200 Leit am Café waren, do gouf et keen Hannerzeg a kee Vijenzeg méi!  
 

Wat war deen trauregste Moment bis elo an Ärem Liewen?

Viru ronn 25 Joer, krut ech eng gréisser Somm Sue geklaut. Deemools sinn d’Depositaire léiwer mat Boergeld bezuelt ginn, dowéinst hat ech esou vill Suen am Haus. Weeder eisen Hond, nach ee vun den 20 Clienten huet d’Abriecher bemierkt. 

Wat ass Ärer Meenung no d’Geheimnis fir e laangt Liewen?

Einfach ëmmer zefridde si mat deem wat een huet a sech net ze vill opreegen! Wann ee mol streit, ass dat Bescht et séier ze vergiessen. 

Wat bedeit Zefriddenheet fir Iech?

Ech si frou, wann ech Leit ronderëm mech hunn, hei am Altersheem maachen ech d’Spiller och ëmmer all mat. 

Wat fir e Rot hutt Dir fir déi jonk Generatioun vun haut? 

Sicht Iech e Beruff, deen Iech gefält a schafft gär! 

Gesitt Dir Är Clienten nach heiansdo?

Jo, si komme mech bal all nach reegelméisseg an de Kropemannscafé hei am Altersheem besichen. Da ginn ech all Neiegkeete vun Ell gewuer a mir spille Rummikub oder Belote. 

Mir soen dem Margot e ganz grousse Merci, dass si hier Erënnerunge mat eis gedeelt huet a wënschen hir eng flott Zäit am HPPA vu Réiden.