Schankemännchen 2025 - Theater Bei der Däiwel am Juli 2025

D’Schankemännchen asbl präsentéiert fir déi 17. Kéier e Fräiliicht-Theaterspektakel am Prommenhaff zu Groussbus. 

Op 8 Owender am Juli (de 17. / 18. / 19. / 22. / 23. / 24. / 25. / 26. Juli) gëtt d’Stéck „Bei der Däiwel“ all Kéier ëm 21h00 gespillt. 

D’Entréestickete si séier fort, dofir maacht Iech séier bäi (Tel. 671 222 224)!  

Wéi heescht Äert Theaterstéck dëst Joer a vu weem ass et? 

Eis Theaterstéck dëst Joer heescht: BEI DER DÄIWEL. De Jemp Schuster huet dës Tragikomödie geschriwwen, no Fragmenter aus zwee Stécker vum Ödön von Horváth: Himmelwärts a Glaube Liebe Hoffung. 

Kënnt Dir eis kuerz verroden ëm wat et am Stéck geet?

E jonkt Meedchen, deem säi Papp an der Häll sëtzt a seng Mamm elo just am Himmel ukomm ass, sicht en Engagement un der Oper. Et ass iwwerzeegt, datt et dofir gebuer ass, et huet schliisslech e wonnerbare Koloratursopran. Well et awer keng Protektioun huet an ëmmer erëm ofgewise gëtt, ënnerschreift et e Kontrakt mam Däiwel, deen him säi Wonsch erfëllt. Natierlech geet dat schif. 

Wéi passt dëst Stéck an déi haiteg Zäit?

Den Horváth huet déi zwee Stécker an de Joren 1932 an 1934 geschriwwen, an enger Zäit, wou d‘Welt ugefaangen huet aus de Fouen ze fueren. Seng Stécker sinn an den 1930er Jore verbuede ginn an hien huet missen an den Exil goen, well en am Nazi-Däitschland verfollegt ginn ass. En ass 1938, op eng tragesch Manéier, zu Paräis ëm d’Liewe komm.
Haut si mer erëm an enger änlecher Situatioun. Wann s de géint déi rietsextreem Stréimunge schwëmms, muss de vill Dreck schlécken an awer ass et wichteg net ënnerzedauchen, mee an där toxescher Weltonuerdnung de Kapp iwwer Waasser ze halen.

Wéi vill Persoune si mat op der Bün, wéi vill hëllefe soss mat ? 

Et stinn 29 Leit, tëschent 13 an 73 Joer, op der Fräiliichtbün. 22 vun hinne sinn aus dem Kanton. Hannendrun a ronderëm nach eng Kéier gutt 50 Leit. 

Wee riicht d’Bün op?

Mir riichten eis Bün selwer op, mat elauter Memberen aus dem Schankemännchen, déi dat schonn e puer Joer laang maachen an deenen et gutt vun der Hand geet. 

Wéi gesäit et mam Iessen a Gedrénks aus?

De Catering am Prommenhaff ass vun 19:30 Auer un op. D’Virstellung fänkt ëm 21:00 Auer un an dauert ongeféier 100 Minutten ouni Paus.

Gëtt et soss nach eppes wat Dir eis wëllt matdeelen?

Mir spille bei all Wieder, well egal wéi: Et geet „Bei der Däiwel“. Dat hei ass déi 17. Produktioun dobausse bannt 32 Joer. Dat ware bis elo 110 Virstellungen. Et ass nach keng ausgefall, héchstens emol wéinst engem Donnerwieder ënnerbrach oder méi spéit ugefaange ginn. 

Wéi kann ech d‘Tickete reservéieren?

Am beschten Dir rufft oder schreift eng SMS op 671 222 224.